Thursday, January 29, 2015

Chawlhni tuk khat chu...

Zing tho hma deuh pavalai deuh leh nu thenkhat tuichawi tur a tuikhur lam pana thlanmual kawng lama an tuichawina tin nen an rik tan tawh avangin khua a var chiang tawh hle tih a hriat theih a. Chung zing tui chawi te tuikhur atanga an lo let leh lam an tui kawh lai leh chhipchhuan lai a tui thalna no tin (hetiang tin hi a tlang puiin tel bur ruak a ni a, a pang ah saptawngin  'mustard oil' emaw vawitawng in 'sarson ka tel') chhung ah an dah an ke pen rual a tui fawk in tin tlang nen a khak rik chhak chak pawh a hriattur a awm tan a. Thenkhat tuikawt thiam lo deuh an kal pah a tin inthen nasat thin vanga tui lo fawk chhuak tur dan nan a katchat leh hnimhnah sei deuh tui chunga rawn dah haw tawk pawh an awm zauh zauh a ni.
Sialsuk Tuikhur
Chawlhni zing anih avangin thingtlang lamah chuan tunlai  angin inbiakpawhna te a awm that loh avangin radio hlathlan leh thupuan te hi  khawpui lam leh kar hla zawk a laina te chanchin a hriat theihna a nih thin avangin a bikin chawlhni zing a fakna hlathlan phei chu ngaihthlak loh theih loh a ni thin a ni. Zing dar 6 a ri a All India Radio Aizawl Station programme tan nan hnamhla 'Vande Mataram' vai zaipawl aw per tak tak in an sak ngei mai chu an rawn zai tir ruai ruai a, chumi hnuah dar 6:10 thleng saptawng leh vai tawng a chanchin thar puan in a zui a, dar 6:11 atangin thupuang tu in "Hei hi akashvani Aizawl a ni a, vawiin a kan changthlan atan...." tiin Bible chang a rawn chhiar chhuak a. Chumi hnu ah tunah chuan Fakna hla in thlan te kan lo ngaithla dawn ang tih puang chhunzawm in "in hla thlan hmasaber atan ........tih hla..................sak chu kan ngaithla dawn a ni" hlathlan hian dar 6:45 thleng a awh thin a vangin tuichawi kal leh let lam te chuan radio nei te In kawt vel an kal pelh chang pawh in hlathlan an puan mek chu an hre pha fo thin reng a ni. Tlangval thenkhat phei chuan radio zai chu kawng atanga lo zawm ve in tuikhur kawng ah te a sa chhunzawm phei rat rat zel a ni.
Sialsuk naupang fel tak tak te
Tuichawi tam zawk hi thalai leh naupang te an ni a, thalai awmlohna pahmei chungkua leh tlema  kum lama upa tuichawitu tur dang nei ve lo te an awm zauh zauh thin bawk. Thalai leh naupang tan chuan tui chawi ngah hnu ah inchhung tih fai leh nu te eirawngbawl puih te a tul thin a, mipa rawlthar ho tan pawh chawlhni zing hi thiante nen inthurual a lu meh nan a remchang thei hle thin bawk, an sir ah tlema val upa deuh tawh pahnih pathum ten zial zuk pahin an naute lu meh na sir ah nilum hnungpuak pahin zan hmasa lama an mikhual nula rim chanchin sep bawk fo thin. In tinin chhuat atan thingphel an hman avangin naupang ho in sitting room chhuat nawhtlet/nawhfai chu an tih tur ah an ngai a, an u hmeichhia ten mombati chhuan tui leh khawnvar tui chawpawlh siam in an lo tanpui thin bawk a ni. Mipa rawlthar lu met zo chuan chaw ei a la hun lo deuh avangin pheikhawk siai hnawih emaw istiri a thawnhnawm nawh chu an tih a ngai fo bawk. Chhungkua mahni buai buai an phut mur mur laiin bialtu upa pawh thawhlawm ip sem in bial chhung in tinah an lut chhuak a, Kohhran thalai hruaitu te pawh chanchinbu leh committee kohna ilo sem in In tin an lut chhuak thin bawk a ni.

Zing dar 7:30 a lo ri a, AIR chuan 'Thlirvelna" hun rawn hmangin nimin leh nizan a ramchhung leh khawvel hmun danga chanchinthar awm te a rawn puang chhuak a, minute nga dan ah 'chanchin kimchang zawk in' tih leh 'chanchin tih tawp nan a tlangpui' tih te an zep thin a ni. Chumi tuk chuan radio thlirvelna chuan khawpui lamah chanchin tha lo thleng awm thu an puan loh avangin a lungfing chin chhungkua a pa ber leh nu ber te leh upa lam te pawn chawlhni tuk dang ang tho a ni tiin radio a zaipawl zai chu an ngaihtha takin an ngaithlak chhunzawm a. Nuber in a fate an insil tir zo tawh a,ei rawng bawl a peih tawh avangin Paber thupek in radio pawh 'off' a ni ta a, sitting room ah chhungkua in chhung inkhawm an nei chhunzawm a, Paberin hun hmangin an hma lawk a vawksa leh antam chhum an hmeh tur hrereng in tawngtaina ah pawh malsawm chaw chu a hlan uluk khawp mai. Hlim tak leh puar takin chaw ei kham a ni a, inkhawm turin an insiam sang sang a, tlem a chaw ei hma deuh chhungkaw thenkhat naupang te phei chu insiam sa diamin kawngpui ah an kat nak nak tan der tawh a ni. 

Naupang ho an thiante insiam nghahpah a kawngpui a hlim tak a an lo fiam mek lai in a kawn lai tak ah kawng pengthuam awmna ah chuan Bus pakhat chak lutukin a rawn tlan chu an ding chawt a,  naupang ho chuan motor te an hmuh khat em avangin "hei hi ka ta lem, kei a khalhtu lem ka ni" an lo ti hmanhmawh bawk a. Bus khalhtu (a driver tu pa ber) chu rawn dak chhuak in khawi kawng peng zawk chu nge chhimlam panna zawk tiin a bul hnai a lo ding rawlthar pakhat chu an zawt a, a ni chuan kawng peng pakhat zawk chu damdawiin panna a nih thu leh pakhat zawk chuan Mizoram chhimlam a pawh zel thu a hrilh a,tichuan hmanhmawh takin Bus chu an ti nung a an tlan liam leh ta mai a. Chu rawlthar kawng lo kawhhmuh tu chuan Bus driver leh a chhung a chuang te chu tute nge an nih tih pawh ngaihtuah chhunzawm em em lovin a pu in kuhva khawr a lei tir chu In va pek pahin rang takin Sunday School kal turin a In atang chuan a chhuak leh mai a. Biak In tlang a thleng chhova an khaw tawp far (pine tree) hmun hnuai Aizawl lam kawngpui a motor rawn de zawk zawk chu a hmuhnawm ti takin a thiante nen an thlir thap a, rei lo te ah motor dang a lo lang leh a, tichuang motor an rawn in zui tak pheuh pheu ah chuan tiin chiang leh zual a hmuh tumin kawn lam ah bawk chhuan hmanhmawh bak lekin an tlan thla leh ta a. Chung motor lo tlan ho chu Police truck niin a chhung ah Police ho silai leh hmanraw dang nen an rawn in beng khat vek hlawm a.

Naupang chang nilovin puitling te pawn chutia Police motor hmanhmawh taka rawn tlan chuan khawi lam nge an pan dawn a? engthil nge thleng ta? tih hriat chak in an inrawn nak nak hlawm a. Hmun dang atanga thil thleng leh thuthar an hriat na ber zingkar AIR Thlirvelna lah khan  engmah chutiang chanchin tha lo an puang bawk silo a, a khawpum chuan an ngaihdan leh rinthu bak thu thar hriat an nei thei hrih silo. Mahse, vanneih thlak deuh in Police motor pakhat lo tlan kuhva leh meizial lei tur a ding zawk chuan jail tang tlan chhuak an awm thu an rawn sawi chu khawpum ti ti a ni chhunzawm ta a, chutih mek lai chuan an khaw Police station a radio operator zinglam duty zo rawn haw phei chuan Central Jail atanga mitang tlanchhuak ten Tanhril Ramrikawn a thingtlang Bazar Bus ding lai ru chhuak in chhim lam pana an tlanbo thu a rawn sawi chuan khaw mipui te rinthu sawi chu thudikin zawk a rawn nemnghet ta a.
Kawng peng awmna kawn,Sialsuk
Inkhawm dar a ri vang vang a, chumi chawlhni tuk a inkhawm te pawh chu an rilru ah thildang vak a leng lo, mitang tlan chhuak te chu tute nge an nih a, khawi nge an thlen tawh ang tih te an ngaihtuah theuh in a rinawm. Naupang lam Sunday School pawh pawl lak a buaithlak khawp mai, an khua motor a hmuh mai mai tur a tam lo a, chumi tuka a khat tawk a kawngpui lama motor a rawn rik reng tak ah chuan zirtirtute tan pawh naupang ho motor hmu chak hauhpawh huam a tukverh lam a an dangchhuak fur hmuh chuan inkhap chi zia zang a ni hrih lo.Naupang ho chak ber chu Sunday School ban vat vat a kawngpui a tlan thlak a motor lo tlan lo thlir chu a ni.

Chu chawlhni tuk khat a thil thleng chuan chawhnu lamah chuan rampum a fan chhuak a, Central Jail atanga tlan chhuak te Bus ruk chu a diesel a zawh avangin Sialsuk leh Thenzawl inkar ah hnuchhiah in ramhnuai lamah an tlan lut tin hriat a ni a, Sialsuk Police Station hotute pawn an chhehvel khua ah te ralkhel thu thawn darhin khawtlang hruaitu ten an inhmukhawm nghal a, heng mitang tlanchhuak te hi mi tawraw tak tak annih avangin a tuk thawhtanni ah pawh man an la nih loh chuan tumah mahni a ramkal loh tur leh hmeichhia phei chu mipa kalpui neilo in dai vel ah pawh thingphur a chhuak lo turin an in hrilh hlawm a. Tichuan a tuk  alo ni a, Police lam ten mi tang tlan chhuak te ngawrh takin an zawng chhunzawm a, khawchhung lam pawh pavalai leh tlangval ho ten misual ten an rawn tihbuai palh tak hlauh in tih thulh ah an insem darh a, dai hmawr leh kawng khan zawng zawng ah vengtu an in dah  a ni. Atuk leh a lo nih chuan chung misual te chuan Serchhip ram ah mi nu an pawngsual thu leh chumi hnu ah thah thu a rawn thang a....rei lo te hnuah heng mitang tlanchhuak te man kim an ni  leh a, an rawn tlanchhuahna Central Jail lamah an man hmasak apiang an khung leh zel a ni. Chu khua a thil  rawn thleng mit a lo hmutu te leh a hmun a awm ve te chuan an sawi chhuah nikhua apiang in "Kha chawlhni tuk kha chu.." an ti ta fo dawn a nih hi mawle!
Sialsuk, Kawn veng

No comments:

Post a Comment