Thursday, January 29, 2015

Chu tlangah chuan

Zirlai nih lai chuan lehkha zir a tula, mahni tawk a buai inti ve em em in nitin hun hmangin Zofaten kan nghahhlelh em em Krismas ah tak ngial pawh mahni In lumah hmang hman dawn lova inhria in a kum thum nan vairam ah bawk U-A-MA tih leh angai dawn si a. Chutiang teh nuai karah chuan ka comp ah Anti-Virus update a angai a, update lak pahin internet ka hmang zawk dawn e tiin thiante ka vai liam a, mahse ngaiteh hei www.vanglaini.org ka hawng a, BIHCHIANNA column ah hian a column changtupa ka hmingpui leh ka thianpa duhtak, ka putea ni bawk Zara'n (R.Lalzarmawia) ka ngainat zawng tak thil a lo ziak leh pek a, "Thiante nen" tih thupui hmangin..ngawi reng a hawsan thei ka ni lo. Engah nge kan naupanlai chanchin a lo ziah teh reng! 'Chu tlang ah chuan' a tih hmun ngei chu a hnuaia thlalak lolang hi ani a, Batling tlang kan khua a mi ani a, lung a va han ti leng tak em...


Hman deuh khan amah thianpa Zara tho hian tum khat Inrinni tuk hian SMS a rawn thawn a engdang sawi lo chuan "
"Hlobul lai phutin tui kan khuap a, achangin hriati te kawmthlang lungpher ah te khan kan tawlh tak ang pir per a..." tih leh "Hmanah chau naupang rual khat kha Batling Tlang ah an thu khawm tel tel a, vai film an sawi lo leh, ti hian thla la se, ti hian ka awm anga an tia, chung hun lai chuan Bill Gates te hi an la piang silo..." hemi pahnih ngawt pawh hian,nilengin nunhlui min ngaihchhuah tir a...tunah ti hian chumi chhunzawm nan chuan Vanglaini chanchinbu lamah a rawn tial leh ta bawk si....he thlasik rim nan tan leh Krismas boruakin min tuam tan mek lai hian " kar hla a leng rual duh te in dam lai em ni le?" tih mai a awl ta..www.vanglaini.org hriatthiam na ka dil e..hei angai ngai in ka rawn post hnan ve hmiah e...


"Thiante nen" - by Zara
Vanglaini Bichianna 2007.11.08

A khuhhawnna :
'Thiante nen...' han tih hi chuan, engkim hi a fel vek thin zuk nia! Thiante nen mi huanah 'pear' thei kan lo ru tawh a, 'thiante nen' a nih miau avangin a mal tawrh theih ngawt loh. Mi kan chhaih kawlh fo a, 'thiante nen' a nih miau avangin naupang sual fâl bik a nih theih loh. 'Thiante nen' a mi in chung vawm a, tlan chhiat ham ham tluka nuam kha kan tawng khât viau a, 'thiante nen' a meizial zûk rûk kha a him duh phian bawk - puhmawh tur leh chhuanlam siamna tur an awm thei tlat thin a...

Kan chawlhna tlang :
Thiante nena kan chawlhna tlangah khan tunah takte hian phul la cham dul tak maw? Thakthing leh hriang pil kan seh chawt chawtna thin hmunah te khan eng thil ropui dang mah la awm belh leh ta lo pawh ni se, thianteho kha an awm tawh dawn miau lo va, kha kan chawlhna tlang pawh kha a khawhar ve-in ka ring hial thin!

Hmanah chuan... ngaw hnuaia tlang phul hring dup chungah khan mipa naupang rual an lo lang a. Vai film-te an sawi khawm tel tel a, an phur zual châng chuan phul chungahte an let tawp tawp a; thingzâr buk tha lai deuhte chu an sûk rawn luih luih a, a huho-in an tla hlâwm tap tap a; a insawh na deuh apiang an nuih a, nat hi thiang ve lo ang hialah an ngai thin. Chutih lai chuan Bill Gates hi a piang ve a ni tih an hre lo va, khawlthluaknei chanchin phei chu hre lo chhah tak an ni!

Mahse Rockfeller leh Rocky Mountain hre lo hian a lo hlim theih khawp mai! Tlang leh a chhehvel ngaw hnuaiah khan an duhkhawp hlimna chuan a uap reng tho a, hla taka vur ram te; vur tlang pang leh kham te; khawpui ropui taka In chhawng ngir khup leh lirthei intlan thelh seng sung te an mitthla thiam lo. An mitthla thiam tawk nun kha suangtuahna maiah chantir lovin, a takin an chang nghal a, 'Chitrahar' nunchan leh 'Mr India' film-te chu kha tlang phul hmunah khan vawi engemawzah an chang nawn tawh a, ban phak loh nun leh, chen phak loh hlimna awh belh leh tur chuang an hre lo.

Chu tlangah chuan... :
Chu tlangah chuan Robin Hood leh Dharmendra te; Platini leh Sudden-a te... lehkhabu leh thawnthua hming chuangte reng reng kha chu an chuang chhuak kim hial awm asin! Mithun leh James Bond ni theite inchhuanna leh lalna tlangah khan engkim hi a awm a, a tak hmuh tur awm lo-te hlei hlei kha a tlachawpa hman tur a tam a; pawhrual hnah leh cheng za nga note hian inhlut hleihna reng reng a nei lo!

Ral hla taka leirawhchan siamna atanga meikhu lo khu chhuak vet vet kha 'industry' an hmuh hnaih theih awmchhun a ni a, vansâng taka 'China balloon' an tih thin leh helicopter bak kha khawl ropui dang reng reng hmuh tur an nei lo. Mahse chu tlang atang chuan Tlawng lui luang lai an hmu phak a; Bangladesh tuikhuah pawh rinna mitin, romei zam karah mitthla nen an hmuh pawlh thei a; boruak mel sang tam tak dana khaw pakhat rangva In chung tle vur leh kawngpui niawm tak an inrinsiak luih luih thin te bak kha chu mihring chhul chhuak thiamna thil ropui reng reng hmuh tur an nei lo.
Mahse Tlawng luite chuan an ngaihtuahna chu ram hla takah a luanpui châng a awm a, van boruaka mupui dir cher cher-te chuan an suangtuahna a sawrbing zawhsak vek chang pawh a awm. Phengphehlep um chawn chawn chang a awm a, thing lawn nuam deuha zâwng lem chan vak chang a awm a... film shooting leh nula tlangval inngaihzawng chanchin sawi khawm tel tel hunte kha programme ropui tak ni lo mah se, khatiang hun kha tawng dawn ngat ila, kei chu sawm nawn ka ngai lo vang!

Rampalailêng nun :
'Buannel ram dai' hla leh 'Tarzan' hla nena zai liah liah chunga ngaw hnuaia mipa naupang rual intlansiak ta chiam chiam thinte kha...
Chhungte 'phalna lo' nen ngata ngaw hnuaia nunchan zir tura insawm khawm an ni miau a, hauh hlau reng renga tlanchhe chung khan hlauh reng reng an nei lo! Ngaw hnuaiah tih tur tul reng reng nei lo khan an inbin liam tlai tin a; hling leh hnim bawn pawh pawisa lo va, chhuk leh chho zawnga lim puat puat thei nih tluka huaisenna puitham a awm lo va, kawrkilh tihtlak vanga lungngaihna erawh kha chu inhnem theih a ni lo - 'a tla palh' tia nu leh pa court-a insawifel theih a ni lo ang bawkin, insawipui theih chi kha a ni tlat lo.

Mahse sava veh ipte vuan chung a, hnim pik kara intlansiak chiam hnu a, hah thawh hlawp hlawp chunga luite kama thut der der hlutzia chu a taka chan ngawt loh chuan a chiang pha lo. Luite kianga katchât leh lui tuia ulawng leh tuitifiminu-te nen chuan ruam khatah lungrual takin an luang za a, lailen leh vate thla zap ri pher pher te; mipa naupang chiau teng tung leh rala thing tuk ri tlauh tlauh te; kawlkila ni tla tur inphan vel diar diar thinte kha hmanah chuan rampalailêng nun tithlakhlelhawm bertu a ni thin.

Khua a lo thim dawn a, ngaw chhungte chu a hnim ruih tawh a, sava thawm a ri chiah chiah a, luite chhehvel leh tlang pangper-te chu a dai ruih a. Mahse mipa naupang rualte kha In lama lehkhazir thlakhlelhna reng reng nei lo, zirlaibu aia sairawkherh ngaina zawk; zirtirtu hmel aia sava bu hmuhnawm ti zawkte kha an nih miau thin avangin, tlai ni tla tur khan an tan hunbi a ruat ve phak lo va, kawlkila ni a pil ruai ruai tawh hnute khan, "Ka uai ve ni" tia pipu-a uai tan tum chauhte kha an awm nawk a, riltamte pawh hi mahni duhthlanna hmun nuamah chuan a bo duak thin a lo nih dawn hi le!

Tlang huai :
Inrinni tuk-puma tlang phul chunga tâl a, inrawt phur zual chânga ngaw chhunga sava veh leh ngawt thin tan chuan sava chiar noh noh kha naupang rual dang aiin a enghelh awm loh zawk daih.
Naupang rual dangin an lenna tlang phul an rawn luah ve chuan, 'chala chil hnawm hmasa sa' tactic hman a ngai fo a; chak zawk paw'n, chak loh zawk paw'n, insualte chu tha tam a ngai miau a, a tha hek lo zawnga phul chunga mut maimitchhin siar siar a, mahni ngaihven zawng zawng sawi khawm kha an duhthlan ber a nih miau thin avangin naupang rual dang rawn lang ve thin chuan an khawvel a chawkhnawk fo.

Naupang rual dangte nena inbakkaih hun a lo thlen châng a, 'Anu-te'n insual an phal lo' tih ngam tluka huaisen thlak kha a awm lo. Kha tawngkam hmang tur kha chuan huaisen a ngai em a, insual a tul leh thin!

Khawi hmunah pawh, eng hunah pawh, eng khua leh ram pawh ni se, rilru leh taksaa sualpui tur an awm loh hi chuan hmun leh hun nuam hi a hranpaa zawn leh chuan a ngai lo. Kham pang awih vet vutah pawh nui uar uar chungin an inchhawm chhuak a, luite dung zawh châng a, lêngkir hêlna kawng an zawnna lama lum hnang ta awl awl an awm fo. Mahse thingler sâng taka lawn a, thinglera hming ker thei ngaisang thin mipa naupang rual tan khawvelah hian hrehawm a awm lo va, natna ai mahin thiante kawm theih loh kha a na zawk.

Chutiang boruak inlumlet vut vut karah chuan khawvel ni hi vawi tam tak an vui liam a. Khawvelah hian eng hna nge an hmabakah awm, tih ngaihtuah chhuak thiam lo tura naupang mawl an ni a. Saihlum hrual lai nun leh zat leh zata theirah insemho dial dial lai nun chuan khawvel thianghlim lai a ngaihtuah chhuahtir thin dawn a ni, tihte phei chu han suangtuah thiam chhin tur an awm lo.
Kezungpui kawhna lam apiangah mihring hi a kal ngawt lo va, a taksa chunga thluak bur sukthlekin a her vel thin a ni, tih an inhriat hnu chuan, khawvel hi a lo danglam zo ta...
"A then Rihsâng mual liamin,
A then lenna tlang dang si maw?
Vanglai nun aw, lenlai ni,
Auh ruai ka nuam ngei e."

No comments:

Post a Comment