Thursday, January 29, 2015

Enteh a lo her chhuak leh dawn ta!

Mizo fate tan hian Kristmas hi a hlu zual bik niin ka hre thin! Kum tawp a lo hnai a, abikin zirlai thlasik chawlh nen a lo in nang chhova, khua a vawt var a tlang tin ah romei a zam chiai chiai a, mahni awmna hmun hrang hrang atangin chhungkaw kima Kristmas hman ho theih loh hlauvin hman lo chung chung pawh in kan haw khawm hram hram thin thin. November thla chanve anih tawh hi chuan hmun hrana awm leh mahni In luma nitin hun hmang lo ta chu "I haw dawn em?" tih hi kan zawhna dawn leh mi kan zawh tam ber pawl aniin ka ring. Thil danga han sawi kual chiam pawh angai lo "I haw dawn em?" han ti ila "Kristmas ah maw?" tiin kan in chhang let var thin a, rilru lamah kan chiang tlang em atin ni. Kristmas hian Zofa Kristian te hi min phuar khawm ani ber ani lawm ni?! Kan chhungkua theuhah nghahhlelh awm turin intawnkhawm na hun a keng tel a, khawtlang leh kohhran ah kan inpawhna turin boruak a rawn siam a, chu chuan in pawhna leh in kungkaihna a rawn hring chhuak thin. Hei hi ani lawmni tunlai Zofate tana hlu em em 'Kristmas' mitin thinglung phuarkhawm a lunglenna hmun leh hlimna hun angkhat a min tem tir tu chu?. He mi vang hi ani ang a, Judai ram Bethlehem an tih hmun pawh la thleng hauh lo zaikungpui famta Pu.Rokunga khan "Aw Bethlehem ka ngai em che, Berampu te ram tuanna, Serafim ten zai an vawrna chu, Ka Lal pianna i lo ni" tiia Kristmas hla lunglen thlak em em hi a lo phuah chhuah tak hial ni! KRISTMAS CHIBAI LE.

Mizo Kristmas hla Kristian HLa Bu a awm silo kumtina Kristmas a lo thlen dawn hnaih a ka lungti leng ve thin em em tu Pu.Roliana Ralte (L) phuah "Enteh alo her chhuak leh dawn ta.." tih hian lunglen thu i in hrilh tawn mai teh ang u..mi ramah zawng Tlangsam par te hmuh tur aawm ve silova..Khawvel hmun hrang hrang leh tlang tina ka thian duh tak te u a lo her chhuak leh dawn ta mitin tana hlimna tur chu...hei le kan zai hla tur chu..

Hun leh ni te an her liam zel a,
Sikni eng mawi a lo lang leh ta;
Parmawi tin an vul, Sirva lungrual nen;
Lal piang hmuah zai an rel em ni ?

En teh a lo her chhuak dawn ta,
Mintin tana hlimna tur chu;
Famngai , khawhar mangang te Lalpa,
Min hnemin min awmpui ang che.

Hmanah chuan lenrual duh te nen,
Fak hla sa a tlaikhua varin;
Hlimni ral tur ui em em in,
Lal lo piang hlim ten kan lawm.

Theih chang se chhungkim lungduh te nen,
Lal piancham lawm ka nuam e;
Suih lung ruala tlaikhua var in,
Thinlai ruk lawm a kim ngei ang.
Mahse reilo teah i ral leh dawn,
Hringnun khua a har leh ngei dawn;
Nunhlui, kum hlui chang leh mai tur,
Engtikah tawng leh ang i maw ?


No comments:

Post a Comment