Thursday, January 29, 2015

Hyderabad ah kher maw? (why Hyderbad?)

Chawlhkar tluana mahni zirlai leh hnathawhna lamah nitin a chhuak thin te tan chuan weekend a thiantha emaw chhungkua te nena Park leh Mipui punkhawmna hmun(Theatre, Restaurant, Auditorium etc) vela han tei chhuaha nitin hna tul kalsana rilru thawl hek hawka hlim taka midangte ruala boruak zangkhai leh hlimawm tem tura han tei chhuah chu thil chakawm leh tih makmawh ani fo thin.


Vawiin pawh hian chawlhkar tawp Inrinni ani a, Nizam khawpui tia hriat lar thin Hyderbad khawpui laili lai velah chuan ruah a sur cherh cherh a, Uppal venga a cheng Engineering course zir theih nana counselling nghak mek N.Srilekha(18) chuan a cousin Class- IX zirlai D.Sravanthi (14) chu sawmin Ch Susheela (45) leh hmeichhe dang pakhat te chuan ruah tla seng seng karah chuan weekend chawlh lawmna ni pah fawmin leh kar lehlawk ah khian an nghahhlelh em em ‘Rakshabandan Festival’ a nih dawn avangin ‘Rakhi’ tur lei angai tho bawk a tiin lungmuang takin Koti lam panin hlimtakin an in khalhchhuak a, Gokul Chat Bhandar zawn an thlen chuan ‘Rakhi’ tur lei hma a inhnawhpuar turin car atang chuan an chhuk ta a. An Driver pawhin car park na tur zawngin piah lamah a tlan san ve mai a. Ngaiteh! Chu driver chuan a pi te ho Gokul Chat Dawr chhung an lut chiah ang tih awm velah chuan thil puak ring tak leh rapthlak tak a hre chhunzawm ta mai a, mipui mangang pungkhawm leh zi nuaih nuaih karah chuan nachin lawka thil ei tura car atanga chhuk a pite 4 zinga 3 chuan chu a thil ri hriat rapthlak tak avang chuan “Ma’m Saab” ti a koh theih tawh loh turin he khawvel hi misual te pawikhawihna avangin famkhua an lo chan san ta ani. Hemi ni vek hian Amberpet venga awm Akramullah Khan (22) leh a nau hmeichhe 2 te pawh Koti ah hian lehkhabu lei turin an kal ve bawk a, an duh ang lehkhabu te an lei zawh hnu hian Akramullah hian a naute thil ei tur lamin Gokul Chat dawrah chuan a luhsan a annin a pawn ah an lo nghak a, amaherawh chu Koti an kal apianga an theihnghilh theih tawh ngai loh turin beisei loh thil a thleng ta! an unau pa chu chu dawr chhungah chuan kir leh tawh ngai lo turin mi firfiakte bomb tih puah avangin a nunna hlu tak laksak in awm ta ani.

He mi ni Dt.25.August.2007(Inrinni) tlailam dar 7:25 p.m (IST) velah hian Hyderabad mipuite tana theihnghilh theih reng reng tawh lo turin Lumbini Park, Necklace Road a, Open Auditorium ah leh Gokul Chat Bandhar, Koti ah rapthlak takin Bomb a puak a a hmunah mi 30 chuangin nunna an chan nghal a, mi 60 vel in hliam na takin an tuar bawk ani. Heng bomb puahna hmun 2 te hi a 5 Km vel chauhva in hlat ani. A hnu leh zelah thi zat hi 40 chuang an tling chho ani, Mitam tak hliam tuar Hyderabad Damdawiin hrang hrang ah enkawl anni a, thu neitu ten khawpui pumah(Hyderabad- Secunderabad) inralrinna leh dan leh thupek khauh takin an keng kawh nghal a, theihtawp chhuah mahse he thu ziah lai thleng hian tute nge pawi khawih tute hi hriat chhuah an la ni lo.


Dt.18 May 2007 khan Mecca Masjid Hyderabad Old city area ah bomb rapthlak tak a puak tawh bawk a, mitam tak in nunna an chan a, Hyderabad khawpui a cheng mipui te pawh an ralkhel nasa anih kha. He mi tuma bomb tipuak tu leh pawi khawitute pawh hi vawiin thleng hriat chhuah an la ni chuang lova. Hyderabad khawpuia awm ve mek ta chu heng beisei loh thil thleng a awm tak zauh zauh avang hian ngaihtuahna ah enga tinge hetiang thil rapthlak tak tak te hi Hyderabad khawpui, India ram khawpui te zinga muanawm leh nuam ber pawl tia ka lo hriat ve thinah hian a thlen tak fo mai ni le? tiin a chhan tur awm ang hrang hrang te phak tawk te tei rilru in a dap ve a. Bomb puah tuk hian ka thawh tlai deuh vang leh Mizo Inkhawm a kalhma ka duh avangin duh angin nitin Chanchin bu ka chhiar ve thin The Hindu pawh a phek hmasa ber bak chhiar hman lovin ka awm a. Vanneih thlak takin Dt.27.08.07 (Monday) Times of India (Hyderabad City Edition) page-2 na ah Kingshuk Nag chuan “Why Hyderabad?” tiin tunhnai a Hyderabad bomb tih puah na chhan te, tunhma thil thleng leh a kaihnawih thil pawimawh hrang hrang atanga a thlirdan pawmawm zet mai a rawn ziak a, ka thil lo hriat chak em em anih vangin ka chhiar zawh pawhin rilru ah a awm reng a. Kingshuk Nag thuziah chu Mizotawnga lo chhiar peih te an awm tak mialin tiin leh keimah pawhin belh chian ka duh ve avangin thiam ang tawk tawk in ti hian ka rawn chhawp chhuak ve e…

Kum 2005 India Reublic Day lawmna Delhi ah khan King of Saudi Arabia chu Chief Guest atana sawm anih angin India ram a rawn tlawh a, khatih lai khan Hyderabad Old city area a awm te chuan Saudi Arabia Lalpa in Delhi tlawh a Hyderabad a tlawh ve lo chu ngaithiam lovin an lungawi loh na thu chanchinbu (Urdu newspaper leh English) lamah te leh media hrang hrangah te an au chhuahpui a. “Nizam Lal hi Saudi Arabia a doctor leh car thawn lut hmasaber tu leh Saudi Arabia a Pilgrim House sa hmasa ber tu ania, khati khawpa Nizam Lal leh Saudi Arabia kha lo inthian tha thin anni a chuvangin King of Saudi Arabia pawh hian India ram a rawn kal anih chuan Hyderabad khawpui a tlawh hi tih mak mawh ani” tiin King of Saudi Arabia in 2005 January a Hyderabad khawpui a tlawhlo kha an lungawi loh na an lo au chhuahpui hial ani.

Ziaktu pakhat chuan ‘Tunlai khawvel hmasawnna (modernity leh economic development) hrang hrang te hian Hyderabad Old City area hi a kalkan a, mahse hunkal tawh kan en chuan Nizam golden era hun lai kha khawvela Muslim Kingdom lian ber ani” a ti. Hetiang hi mipuite sukthlek leh rilru put hmang anih avangin Hyderabad Old City (heta tang hi chuan ‘Old city’ tiin kan sawi tawh ang) area hi Pakistan’s Inter Services Intelligence (ISI), Harkat-Ul- Jehad-Al-Islami (HUJI) te tan chuan Jehadi atang tur zawnna hmun thaber pawl leh hmun duhthu sam ani fo reng ani. Old City area a madrassas hrang hrang te pawh modernized ni tawhin hmeichhiate pawh lehkhazir leh hnathawh an phalsak tawh a BPO office ah te pawh Muslim hmeichhia hnthawk an awm ve fur tawh ani. Mahse mipui nawlpui te rilru puthmang erawh a in thlak hlei thei rih lo.


Bangladesh nen a in kungkaihna: 1990 kum chan ve hnu lam daih atang tawh khan ISI te hian Hyderabad atang hian thurual pui atan mi leh sa an lo nei tawh thin a. Mahse India intelligence lam an duai vak loh avangin leh heng hi an lo hriat ruk ve reng avangin an duh angin thil tih a awlsam ta lova Pakistan mifirfiak te hian Bangladesh lamah bu an khuar chho leh ta ani. Chuta tang chuan Hyderabad leh Bangladesh hian inzawm rukna tha tak an nei chho ta zel a, kum rei lo te liam ta atang phei kha chuan Hyderabad mi tam tak chu Bangladesh ah-Technician- fitters, sumdawng, artist etc hnathawkin an awm hlawm ani. Company tenau ho pawn Dhaka velah thlaruk chhung vel lek lek Contract hnathawk turin an mi leh sa te Hyderabad atangin an intir chhuak nasa a, hei hian zawi zawin Bangladesh a hnathawh pawh a ti awlsam zual ani. Heti tak hian Bangladesh leh Hyderabad hian inzawmna nei tha nimahse hlauthawn turin thil thalo thleng a awm em em hran lova, mahse nikum Dasara lai Hyderabad Police Commissionerate a bomb tihpuah anih khan Bangladesh mi leh sa te tih ani tih hriatchhuah ani a, hei hi Police lam tan chuan Bangladesh mi leh sa te pawi khawih kut a an man chhuah vawikhatna ani thung.He thil thleng ah hian Krishna Kant, Addl.Superintendent of Police chu thah ani a, Bangladesh mifirfiak pakhat Mujeeeb chu pawikhawih tu ni a hriat anih avangin an man a, damchhung lungin tang tura a chungthu rel ani nghe nghe. Mahse Jail ah pawh rei tang hman lovin Independence Day lawmna atana lungin tang an chhuah te zingah Mujeeb hi chhuah tel ve ani leh ta nghal mai ani. Hyderabad mifirfiak te zinga hlauhawm ber pawl Shahid (Billal tia hriatlar) pawh Bangladesh ah awm hmun a khuar in HUJI hel ho te a pui mek a ni.

America pawh in Hyderabad a ngaihven: Bangladesh mi firfiak te chauh nilovin America sawrkar pawhin Hyderabad hi an ngaihven reng a. Kum 1999 khan kha tih lai a US President Bill Clinton chuan Hyderabad tlawhin Microsoft Company a rawn luhpui anih kha. Chumi hnu atang chuan Nizam khawpui Hyderabad chu IT-City tia hriat lar ani chhova, Company tam takin investment ti tur leh hnathawk turin awmhmun an khuar nghal zut zut a, tunah chuan Software-cum-BPO boomtown/Hi-tech City ti a sawi ani ta hial ani. Nikum 2006 khan US President George W. Bush India ram a lo kal khan King of Saudi Arabia ang lo takin ani chuan Hyderabad a rawn tlawh leh chat a, Chennai ah US Consulate puitling a awm tawh reng chung leh Bangalore lam pawn dah ve tur an ngen lawm lawm chung pawhin Hyderabad ah US Consulate hawn ve anih tur thu a rawn sawi anih kha. “Heti taka khawvel ram ropui America meuh pawhin a ngaihpawimawh Hyderabad khawpuia pawi han khawih hi Mifirfiak/Jehadis te tan chuan thil chakawm tak tur ani” tiin Senior Police Officer pakhat chuan a sawi hial ani.

State sawrkarin inven aiin Vote Bank ngaipawimawh zawk: Andhra Pradesh state sawrkar leh Hyderabad Police te hi mi firfiakte bei tur leh an pawikhawih tur veng tur chuan an la inpeih tawk lo niin a lang. AP state hi kum tam tak liamta atang khan Naxalite hel awmna hmunpui pakhat ani a, vawiini thleng hian State Police te nen an la in veh reng ani a. Naxalite hel ten State chhung an tih buai thin em avang leh pawi an khawih nasat avangin ram pawn leh hmun dang atanga pawikhawih tum te an ngaihven hman meuh lo niin a lang. State sawrkar in Police officer te posting leh transfer vel a siam danah pawh hian mifirfiak te laka in venna lam aiin inthlan leh hunah vote bank siam an duhzawk niin a hmuh theih bawk. Tuna AP state a rorel lai Congres party hian Muslim mipuite a thlawp tlat a, inthlan hnuhnung bera an chak theih na chhan pakhat pawh anni vote vang hi ani reng ani. Police Commissioner of Hyderabad hlui A.K Mohanty khan Old City lam hi ngaipawimawh in mi firfiak te tan chet a awlsam ani tih hria in dan leh thupek lam pawh khauh zawk a kal pui a duh thin a. Mahse Congress thurualpui Majlis-e Ittehadul-Muslimeen(MIM) lam chuan AK.Mohanty a thil kalpui dan hi sawi selin an Party M.P leh an President Assaduddin Owasi phei chuan City Police commissioner office chu Left Party te duh dan anga thil kalpui ah a puh let ve tlat thung ani. Hetiang hi Muslim mipuite thlawp MIM party te ngaihdan anih avang hian Congres sawrkar chuan an Muslim mipuite laka vote bank chan an hlauhthawn vet tho avangin Police Commisioner A.K Mohanty chu thlakin a ai ah tunah hian Sardarji ,Balwander Singh a dah mek ani. City Police Commisioner hna Balwander Singh an a vawn tak hnu hian MIM party te hian Hyderabad Old City area lamah phei chuan an duhdan ang ngeiin dan leh thupek kenkawhna lamah pawh State sawrkar an thunun thei ta ani. Director General of Police, M.A Basith hi tunah hian a pension nan thla 2 vel chauh a hmabak tawh a, a hnuaia thawk officer te thunun turin a thu leh hla in ngaihpawh mawh a hlawh em em tawh bawk silova, Police Dept. administration a fel hlel deuh niin a lang. Hyderabad khawpuia danleh thupek keng kawh tu A.P Police te kalphung en hian mifirfiak pawl pawikhawih tum te tan chuan India ram hmun dang zawng aiin Hyderabad hi a lo thlan awm em atin ni tiin a sawi theih hial ani.

Dt.26.08.2007 (inrinni) tlaia Hyderabad a Bomb 2 rapthlak tak tipuaka, mitam tak nunna laksak leh hliam tuara siam tute hian Khawvelah hian tharum thawhna leh pawisawilo te chunga chhiatna thlen tir hian hlawkna leh hlimna tluan tling a pe ngai lovang tih leh he an thil tih hi mi dawizep te kalphung ani zawk ani tih erawh hi chu lo hre lul tawh se……

Pix Courtesy: Joyce Meyer Ministry, Hyderabad.

No comments:

Post a Comment