Thursday, January 29, 2015

I TUNLAI EM?

(He thuziak hi Hyderabad Mizo Christian Fellowship Bulletin 'GILEAD' Vol.VII. Issue No.XV ah chhuah a ni tawh a, a hminga editor ni ve ta fam chu Sermon, article vel chhuah tur haihchham chang a lo awm a, thiam tawk tawk te in tling lo tak chungin mahni chunga mawhphurhna a lo awm ve thin avangin ka'n khawr pum ve thin chu a nia)

I TUNLAI EM?

A thupui atang hian kan thu kalphung tur chu a lang thei mai awm e, thil pahnih khaikhinna a ni a. A zau zawnga sawi dawn chuan ‘tunlai khawvel changkanna(modern world/post- modern) leh ringtu te nun’ te pawh ti ta ila, kan tum kan bosan lutuk lem lo ang. Ani tak a, khawvel hian nitin in hmasawnna leh changkanna kawngah min zuan pui dawr dawr a, tuman kan pumpelh thei lova, haider sanin kei chuan ka duh ve lo pawh ti ta ngawt ila mi rualpawl pha lo nihna mai a ni zawk si. Chutiang nuna nitin hun kan hman mek lai hian kan hriat loh hlanin a kawng leh lamah chuan kan ngaihtuahna, kan rilru leh kan thlarau lam nun thleng hian tunlai hmasawnna leh changkanna kan tih te hian thutak lak atanga pengin boralna lam min hawi tir ve tho bawk a ni.

Kan tunlai hun hman mek hi chu Post-Modern world ani tawh zawk mah e an ti thin. Mihring kan changkang tawh a, hman deuha mak kan tih leh awm lo kan tih te khan thil pangngai an rawn ni chho a. Tih atan a kan tin zawn loh leh kan ngam loh tur tam tak te khan kan nunah danglamna leh thinhrikna min pe tawh lem lo. Kan ngaihtuahna leh rilru put hmang te pawh a zauvin a sang chho hle ta mai. Kan hmanrua leh kan inawmtleina thil (materials/ gadgets) te pawhin hma a sawnin a lo thang chak ta khawp mai. Entirna pakhat atan- kum 8/7 liam ta ah kha chuan Hyderabad khawpuia awm Mizo te zingah ah hian mahni pual a mobile phone nei chu chhiar tham lek annih a rinawm. Mahse tunah chuan za-a sawmkua (90%) te hi chuan mahni in mobile phone kan neih a rinawm tawh a ni. Nie, hmasawnna leh changkanna hi chuan danrual lohvin min nuai mek a, chu tih karah chuan ringtu-nang leh kei hian engtinnge kan lo hmachhawn a, engchen hi nge kan lo tangkai pui le? tih hi ngaihtuah tham tak a ni.

Tunlaina leh hmasawnna chak tak lo thleng mek hi rilru fimin nge kan lo hmachhawn a, anih loh leh tunlai tawngkam takin “who cares...its my style” tiin mitam tak te tih dan thin angin chik lem lovin kan lo ar khawthim dai ve pawp pawp mai zawk le? Hnam fing zawk te chuan “I zuan hma in i zuanna tur en hmasa rawh (Look before you leap)” tih tawngkam te pawh an lo sawi thin kha. Hei tak mai hi Mizo Kristian te pawh hian kan ngaihpawimawh a tul khawp mai. Khawi hmunah pawh awmin engpawh lo ti ila, Pathian ringtu kan nih avangin mahni theuh ah ka tih atan a mawi em? Pathian min hnaih tirtu nge a nih a, A lak atanga min kal bo tir tu zawk tih kan ngaihtuah nawn fo a tha khawp mai.
Tunlai thil tam tak te hi a mahin a sualin a chhia ani hauh lova kan hnualsuat ngawt tur ani hek lo. Amaherawhchu a hmangtu te hian kan hman dan ah erawh chuan chhia leh tha tha kan thliar thiam a pawimawh khawp mai. Kan duh emaw duh lo emaw kan nitin nuna bet tura hun in a rawn her chhuahpui an ni a. A tha zawng leh a tangkaina tur lama rilru kan pek erawh a tha hle. Entirna lo sawi leh ila:Internet hrelo leh hmang ngai miah lo kan awm tawh kher lovang. Internet ah hian awm lo pawh a awm lo ti ila kan sawi sual tam lo viau ang. Engkim kan duh leh kan mamawh te kan browse thei a, a hmang sual duh tan pawh thil thalo leh mawi lo tak tak thlenga en leh hmuh theihna a ni. Chutih rualin mi tam tak chuan chanchin inhrilhtawn nante, hnathawh nan te, zirlai zir nan te, chanchintha puan darh nan te an hmangtangkai thin. A bikin Zirlaite tan phei chuan study materials download nan te a tangkai em em a ni
.
Kan nitin nunah hian duhthlan tur leh kawng zawh tur chiang em em chi hnih a awm a, chu chu a tawi thei ang bera sawi chuan a tha leh a chhia hi a ni. Ringtu dik tak chuan khawvel hmasawnna chak tak leh thang duang tak karah pawh hian awm mahse la, a tan a tha leh thalo a thliar thiam theihnan ama chhia leh thatna thiangtak hmangin thil a ngaihtuah ang a, Pathian rawn chungin a tih tur leh tih loh tur a thliar hrang thin tur a ni. A hunlai a mi zirsang, mite ngaihsan em em Philosopher turu lutuk Gamaliela ke bul ngata seilian Tirhkoh Paula meuh pawh khan Pathian ringtu a nih hnu chuan tunlai thleng pawh kan la zawm theih leh entawn tur atan thu mawi em em a lo sawi lawk vek tawh kha: “Thil engkim tih a thiang a nimahsela thil engkim tih a tha kher lo. Thil engkim tih a thiang a, nimahsela thil engkim tihin mi a siam tha lo”(I Kor.10:23).
Keini tunlai mi/thangthar te pawh hian kan thiltih na engkawngah pawh achin tawk hria in Pathian min hlat tir tu emaw kan taksa leh thlarau nunin a that pui tur thil ni lo te hi chu kan hnawl ngam a tul khawp mai. Chutianga ti thina, a tha zawk thlang thinte chuan khawvelah hian an thil tih avangin rilru hrehawm leh inchhirna an tawk ngai lova, he khawvel piah lam thlengin Chatuana nunna an neih phah hial zawk thin. He leia an nun chhung zawng in midangte tan pawh an nuna hlima leh lungawina awm chu chhiar theih in a lang chhuak thin. Chatuana nunna neih nan nge, boral nan zawk i tunlai nun i hman le?



No comments:

Post a Comment