Thursday, January 29, 2015

KA LUNG A LENG




-Lalzarzoa
University of Hyderabad

Thlasik ani tawh nang a khawpui hu lum lai erawh nipui lai ang mai in chhun lamah chuan a la lum tho mai. Kan awmna hmun tak lamah erawh chuan tlangsampar te leh nihawi parte hmuh tur awm ve chiah lo mahse, kan hma a Lal pian kan ur tih hrethiam ve ni awm tak hian a vawt ve var tawh a. Zanriah bawp man turin kan piah khawpui atang chuan kan awmna lam panin awze ho te nen chuan khawpui fem a tlan thin 7seater/ autorickshaw lian chi ah chuan kan thu ho far a. Thla a eng a khaw hawi a nuam viau mai, kawngsira lung in chher chuan ut pasawntlung ang tak tak te, ralkhata inropui tak tak ding khawn uaih te, kawngsira mirethei ho In kaihkura khawsa mek te leh lirthei chi hrang hrang- ka thleng hman lo ang tih hlau ni awm taka tlan fur fur te kan tlan pel zel a, chungkarah chuan eng eng emaw min ngaihtuah tir a, ka chuan puite ka pianpui tawnga biak theih awm ta lo chu, mahni in rilru ka kawm a, ngaihtuahna ah Zoram thlasik boruak min ngaih tir a.

Kan tlan mek lai chuan kawng sir pakhat ah hian chhungkua ni awm tak pa ber hnathawhna lungral leh thir tiang nena in pu chuan kan chuanna lirthei chu an lo phar ding a, an rawn thut luh ve chuan an vaiin nausen te nen 4 an lo ni a, nuber pawh chu en reng reng pawh hian chhun lamah hna rum a thawk ani tih hriat ngawih ngawih hian a hmel hmai vel chu a sen tul bawk a, an fa upa zawk ni a lang lah chu chaw tha a hmu ngai lo ani tih hriat fahran hian a cher hle bawk a, an nausen erawh anu chuan a pawm muhil a. Chung ka hma a thu vai chhungkua pakhat te chuan a hma lawk a Krismas leh thlasik khua a tlangsam par mawi thin zia te leh kan ram lama Krismas an urlawk nasat tawh tur zia ka lo suangtuah lai mek chu an la peng hneh kher mai. Ka en thin a, kei chhungte zar a lehkha zir ve mek hian ka khawngaih a, anni chuan min awt bik kher lo maithei, an mahni thawhchhuah in nitin eitur an hlawh chhuak thei a, chutih kawng ah chuan ka tluk loh anni. Mahse an nitin hna hahthlak tur zia te, an thawh hah zia chhut in an hlawh erawh a tlem leh viau in ka ringa, an chak lai leh an hrisel that lai chuan an tan ei zawn a harsa bik lovang, nitin hna an thawka an kham khawp chu mite ang ni lo mahse an hmu ve khawp ang. Tunah tak phei chuan pawisa lam pawh an mahni tawk in an nei nual pawh ani thei (an hnathawhna ten tlai lam ah hlawh an pek phal mial chuan).

Chutia ka hma a thu vai chhungkaw pakhatte avang chuan ka ngaihtuahna ah chu lirhtheia chuang ho midangte nen chuan min khaikhin kual tir a, a then chu an kawr hma a an thil awrh atangin software company a thawk anni tih a hriat a, a then erawh college zirlai te, pa pakhat chuang ve pawh an vengah chuan a rawlring pha chin ni awm tak, adul ti kiar huar, tawng lung lung ching ani a, chung ho chuan mahni hmun emaw mahni hna tul panin chu lirthei ah chuan kan chuang tlang chu ani a. Thenkhat chu an nupui fanau/chhung ten nghakhlel takin an lo hmuak anga, mahni in lumah tlai puarin zanriah an kil ho anga, thenkhat an hnathawh na lamah AirConditoned hnuaiah an va thu emaw a niang a. Kan chuanpui chhungkaw pakhat te erawh an tawpna kan thlenga, an awmna an pan lai ka hmuh erawh chuan an khawngaih thlak hle mai. An In chu 4ft vel a sang,a chung chu mau phelsep a kaihkur, lehkhakhawng bawmchhia leh silpoulin te a khuh a ni a, a zau zawng pawh 5ft ai chuan a tam lo tawp ang. Chutah chuan an nitin hna hah taka an thawh hnu in chawl hahdam turin an haw chu ania. An In ah chuan mi pangngai tan a din mar theih lova, thut nan a tawk vel chiah a,chu pawh a ti thang lo tan chuan nuam lo tak tur ani; a mut mar theih mang bawk hek lovang. In chhungah chaw a chhum theih lova, thiantha inleng pawh nei se mi pali vel annih chuan in chhungah a inkawm theih ani lova, pawn ah anih ngawt loh chuan. Inbual fai leh bungbel ilo tih fai pawh pawn ah ani zel a, chung zawng zawng aia la hreawm tur chu: engchen nge chu hmun ah chuan an awm theih anga, khawtlang leh sawrkar lam thuneituten engtik ni ah emaw chuan an la hnawt darh dawn tih thlir chung renga zan mu chhin chu hartak tur ani.

Chu hmun hmuh nuam lo tak leh mi hip lo tak atang hla vak lo ah erawh chuan a khat tawkin In lian tak tak leh mawi tak tak a tlar phei duai lawi si a, rilruah engmah ni-mah- suh-ila, engatinge siamtu thuhmun theuh theuh athen in duhtawka an duh dan leh chak zawng anga nun an hman theih lai leh hman sen loh an neih del dul laiin, thenkhat nikhat atan nikhat hrehawm a tawk tih ang mai in nitinin kawl a ni chhuak chhiar a thawh a tul bik tak mai le? Eden anchhia dawng theuh theuh kan va dang hlei thin ve le? Enge a chhan, tunge a bul tum ang le? Ngatinge nitin rim tak a thawk theuh theuh thenkhat an hlawk thur thur laiin, thenkhat tan erawh hawp khawp hmuh na a nih hram chauh mai le? Mitin hian thiam bik leh theih na bik theuh kan nei ani thei e, chung chu a fing deuh leh a ngaihna hre deuh tan chuan kawng chu a awm na meuh mai, mahse thawh in ang theuh theuh leh thiamna leh theihna in ang theuh theuh zingah pawh he danglamna hi a awm a, a ngaihna hre lo leh fing ve ta lo chuan rah beh leh retheih lam pan mai lo chu duhthlan tur a awm lo khawp mai. Thawhrim chu chawlhna nuam ani an ti thin, mitam tak an thawhrimna vanga dinhmun sang zawk leh nuam zawk a an insiam theih lai in ka chuanpui vai chhungkaw pakhat te pawh kha thawhrim tih zawngah chuan anni tluka thawkrim an awm thei chuang dawn em ni le? Thawkrim lovin taima lo nise an mahni chhawrtu mihausa te khan an hnuaia thawk turin an duh hauh lovang. Angaihna an hre ve lo em ni? Nge an mihringpui ten hman ata tawh an hriatpuina tel miah lovin an chanai an lo lak khalh zawk? Thawkrim theuh theuh an hlawh chhuah in ang ta lo lutuk leh an thawhrim zar zo dan in ang lo lutuk hi enge a chhan ni ang a, tunge he dinhmun in thlau lutuk hi ti zim ta ang le?

Kan Zoramah pawh hian heti reng renga kan politician te leh kan mi thiltithei officer liante’n mi retheite an ngaihsak lova, an sahmim tih puar na chauh ngaihsak a an kal zel anih chuan ka chuanpui vai chhungkua pakhat ang kha kan pung chho telh telh anga, a lian an lian tual tual anga, a te kan te tawlh tawlh ang. Reilote ah Mizoram ah pawh hian slum area te kan la nei mai ang tih a hlauh thawn awm ta (a ni tan tawh mek emni zawk?). Sem sem dam dam, ei bil thi thi ti thin Zofate khan changkanna emaw tiin kan in eibil siak ta lua emni le? Ngaih a va ngam ta lo em..ngaihtuah ringawt pawh in kan nun danglam zel leh dinhmun in thlau ta lutuk hian kan Pipute’n sem sem an dampui lai kha min ngaihtir a, chung hun lai chu chiang in hre pha ve mah suh ila ka lung ti leng tu an ni fo thin! Zoram I tlai ange……..

No comments:

Post a Comment