Thursday, January 29, 2015

Krismas: Dawn ti sei?

St.George's Church, Abid, Hyderabad
This article was published in GILEAD(an official bulletin of Hyderabad Mizo Christian Fellowship) Christmas Special Issue:2006
Krismas: Dawn ti sei
-Lalzarzoa.
University of Hyderabad

Mizo Kristiante hian Kum 1894 hnu lam atang in Krismas hi kan lo hmel hriat ve tan a; Zosap missionary ten nen ringtu hmasa te khan bul lo tanin, an nitin hnathawh lai te kalsanin Pathian bia a inpawl hovin fakhla sa a zaikhawm nan leh ruaitheh te in an hmang deuh ber thin ani. Zofate pawn hma kan lo sawn ve zela, kan nitin nunphung leh khawsak pawh khawvel ram dang mite rual in ke kan pen chho ve zela, kan Krismas hmuah dan leh lawm dan te pawh a in thlak danglam nasa ta hle.

Kan Kristianna in kum za a pelh meuh chuan kan Krismas hman dan leh hmuah dan pawh tun hma a kan ringtu hmasa te hman dan an sawi thin nena khaikhin chuan danglam tawh tak ani. Danglam tur ani hma kan sawn tlat alawm! Mahse, kan hmasawnna hian kan hmuah ber Lal thar lo piang hi hmuh hmaih in a kal pel daih ang tih a hlauhthawn awm ve tho mai. Nikum December thla khan The Hindu newspaper ah article pakhat chuan khawthlang ram(western countries) a Krismas an lawm dan leh an in lawmpuina/chibai in buk na tawngkam danglam chhoh dan te a rawn ziak a, chuta rilru la deuh mai pakhat chu, America President te khuan an Office (White House) atang in US mipui leh an duhsak zawng te hnenah Christmas Greetings an thawn chhuak thin a, kumdang zawng kha chuan ‘Happy Christmas’ tih an hmang thina, chu induhsakna tawngkam chu nikum Krismas atang khan ‘Happy Holiday’ ti a an thlak tak thu a rawn tarlang a. Ringtu ten kan ngaih hlut em em Krismas chu Holiday pakhat ang lek ah an ngai ta mai emaw ni chu aw tih a ngaihtuah theih.

Mizo Kristian te pawh hi khawvel hmasawnna leh tunlaina tin rengin min chim reng a, kan hmasawnna leh khawvel thlir dan pawh a sang ta hle. Technology lama hmasawnna leh Corporate culture ho sumdawnna vangin kan duh emaw duh lo emaw, kan nitin nunphung a danglam a, mite rualin khawvel hmun danga thil thleng te leh an tihdan te awlsam takin kan lo hre ve zung zung ta, chu chuan mimal ngaihdan leh ngaihhhlut zawng pawh a rawn thlak dam lam nasa kawp mai. Hmana kan Pi leh Puten Cachar phai an zuk rum tuma “Ekhai kawng a la bel emai, midang an la awm ve aniang” an tih hun lain nen kha chuan vawiin a Zofate khawvel thlirna leh rilru suk thlek chu in kar hla tak ani tawh. Heng kan hmasawnnate hian nakinah chuan mahni nawmsakna bak ngaihtuah lo leh rinna hnual suat nate pawh a la rawn thlen lovang tih tu nge sawi thei ang le?( a ni tan tawh mek em ni zawk?) Chung hunah chuan Krismas hi chu kan theihnghilh em bik lo ani thei e mahse nawm sip bawlna hun leh Holiday pakhat ve maiah kan la ngai ve mai ange’m? nauthar piang Lal Isua hian ngaihhlut leh lawm a hlawh zel ange’m le? 

Ringtu te tan chuan “Thinlung a lamah hawn ila ro thil dang angai tawh lovang” tih hi kan thupui lo niin “Isu vawiinah hian kan thinglung bawng inah lo piang thar leh la, nang kan chatuan lal turin” tiin sawm zel ila, Bethlehema nau piang Lal Krista chu kan chhandam tu a lo ni zel rawh se. He nau lo piang hian lawm a phu a, alo puitlin hnu ah kan tana inpe in a tuar a; chu chuan kan tan chhandamna a rawn thlen ani. Fakhla siamtu sawi angin “Lei nun in her liam zel karah, hei chauh hriat ka duh: Keima sual ngei ka mualphona, Kraws erawh ka mawina” tih thu dik hi eng hmasawnna thlipui pawh lo tleh mahse a chhem kiang zovin i ring em le.......??

2 comments:

HRINGNUN ZIRLAI: HMEICHHE PAKHAT SA SEMCHHUAHNA HMUNA THAWK CHU

Ni khat chu hmeichhe pakhat sa semchhuahna hmuna thawk hi, a hna thawh tur a thawh zawh hnu chuan sa dahthatna/dahvawhna pindanah chuan va e...