Thursday, January 29, 2015

Sikni Eng


Sikul a kan zir thin Lalzuia Colney ziah 'Sikni Eng' tih ah khan Mizoram a Mizo ten thlasik hun kan hman dan te, thlasik leh Krismas hun in hmeh zia te ngaihnawm takin a ziak a. Thlasik a ni a Mizo loneituten lo lama an hnatul tak kar a Krismas hunpui lo thleng tur theihtawp a an ur thin dan a ziah te a lo ngaihnawm ngawt mai. Kha thuziak ah khan ka la hriatreng chu urlawk ni a ni a khawchhung a kawlhawk lo thlawk ri lunglen thlak zia te, nu leh pa ho lo lam kal haw in khawchhung an luh rual in In kawt a mithenkhat in chhangban an den na sum a an chhang den an tihbuak var lo awm chiai te an rawn hmuh thu te, mitin in sikni eng mawi tak hnuai a hun an hman dan a hrang hrang a ngaihnawm tak a a ziah kan zir thin lai khan tiang em em hian lung a la ti leng ang tih kan zir tel si lo! Khang hun lai te kha ngaihtuah let in kum tam a lo liam ve ta reng mai, thlasik khua lo thleng leh tan mawlh hian a ni thil hriatchhuah loh loh tur nunhlui liam tawh te min hriatchhuah tir leh thin!

'Sikni Eng' tih chu mithiam ten sawi ta se Mizotawng a 'thlasik ni'/'thlasik khua' tih sawifiahna hlathu tawngkam (poetical word) a ni e tiin an sawifiah mai awm e. He 'thlasik ni' hi a lawm Mizo tlangval a hnu a IFS nita Pu K.C Lalvunga(L) 'Zikpuii Pa' ti a ka hriatlar tak zawk khan Shillong a lehkha a zir laiin a lung a ti leng ve ngang a niang 'Sikni Eng' tih hla hi a rawn phuah chhuah tak hial ni. Chu Shillong thlasik rim nam vawt ruih tawh hnuai atang chuan hlathu hmangin mawi lutukin thlasik khua 'Sikni Eng' chu nula hmeltha ber pawhin i mawina hi a tluk pha lo che a lo ti vawng vawng a nih kha, chu aia uar leh zualin pangpar mawina zawng zawng pawh hi nangmah vang a la ti ta deuh deuh. A mawi ngang aniang sap ho khawl tha ber ber pawh khuan nang ang a mawi hian thil an la siam chhuak lo ti a he 'thlasik ni eng' mawina hi a lo phuahchhuak hial kha a dem awm lem love. A mawina hi sawichhuah thiam mai aiin a taka tawn hian chhungril zun ril tak a keng tel tlat alawm.

Zikpuii Pa duhthusam ang kha nei thei ila kei ngial pawh hian ka thlang fo thin in ka ring. Thlasik rim a lo nam a, hma lawk ah Krismas hunpui in min hmuak a rilru hi engemawni hian min mawlh a sawifiah thiam hleihtheih loh zun hian min uap tlat thin. Rilru ah tunhma nunhlui a lo lang a, mitthla ah tu tu te hmel te pawh a rawn lang uai uai a....mahse koh let theih a ni tawh lo....hun in a liam pui tawh si...mahse...'sikni eng' zunzam vang hian rilru ah erawh an lo thar leh thin a nih hi. Amah Zikpuii Pa hlathu ang hian lunglenna thlarau in min pawl chang te hi chuan sava te nen a nun in thleng a an mahni ang mai a hla te khua a thlawk bovin khawvel lungkham na awm lohna hmun a duhtawk a nun hman a chakawm thin. Pu K.C.Lalvunga hian he thlasik zun hi a hrechiang thawkhat aniang 'Nang ni i ni ngei ang Lal Isua pawh khan pianna hun atan a rawn thlan chat che ni' a lo ti hial.


Keini 'Sikni Eng' ve te pawh kha a lem chuang lo, Sikul kan chawl a ramhnuai ah kan kal a tlangsam par leh kawihthuang par kawngsir ah kan kal pel a chungte erawh chuan Lal Pian hun a hnai tih min hrilhfiah thin. Khampang a nihawi par eng chiai te khan 'Krismas ruai theh' min ti chak a, Masi hman na tur thing phurh te kha min ti phur zual thin a nih kha. Khua a ro a tui hna a lo tlem a inbualfai a peihawm lova, taksa a rawn chat a....mahse kan phunnawi lo, Krismas a hnai tih kan hria a.....engmah in chhungril nun hlimna kha pawlh dal thei tak tak thin lo. Thiante Aizawl kal haw in thawmhnaw thar leh thil thar dang an rawn hawn te khan mahni ta ni miah lo kha a neitu ang mai khan kan lawm a kan ngaihhlu in kan phur pui thin. Khang hun lai tak te kha aw kan rilru ava lo thianghlimin chhungril ah in insikna leh elrelna kan tih te hian hmun a chang ngai lo. Thlasik khaw ro hnuai a hnahchhawl hmang a motor lem chang a kan tlan khuk pui rum rum lai te khan he hringnun buaithlak tak hi mahni theih tawk a hmachhawn a la tul ve dawn tih te kan hre pha der silo........he thlasik khua hian zunzam ken tel a lo va ngah tak em! Nguntaka ngaihtuah let leh changte hian Krismas chauh nilovin kumtawp sikul chawlh atanga kumthar sikul luh leh hmazawng a thlasik khua chuan a hlimtaka nun kan hman dan thin te kha fang let leh thei ta hlauh ni ta ila......Savate anga nun inthleng pawh kan chak bik chuang awm love! Zikpuii Pa 'Sikni Eng' hi lo zir chiang ve teh u, a phuah fuh kher a sin!


SIKNI ENG
-Zikpuii Pa

1. Kumsul lamang alo her chang hian,
Sikni eng mawi a rawn thlen leh ta,
Zingtian lenkawl leh ram loh lentu;
Thingsiri zar tin an mawi mang e,
Thlir ve u khawvel mawi na hi,
Nungcha rawl leh partin hian;
Siamtu famkim zia an tar,
Hringmi leng hian dawn thiam ve maw?

2. Tleitir sakhmelin a cho lo che,
Partin mawi na pawh i zar anni,
Sappui thil tin tuah rem thiam pawh hian;
Nang anga rawng mawi an bang ngailo,
Aw khawvel mawina sikni eng;
Ka fak seng lawng che lungmawla'n,
Nang hi ini ve ang,
Remna lalfa pawh khan a rawn pan.

3. Thinlai afan nunhlui mualliam hnu,
Thinlai darthlaleng a’n a lo lang,
Suihlung lengin khuatin hawi ila;
Chuan ka nuam lentu zothing tin dir,
Sirva len thiam nun in thlengin;
Khawvel taksa lungkham pelin,
Chuan ka nuam ram loh lentu,
Zingtian sikni eng mawi lawmin.

No comments:

Post a Comment