Thursday, January 29, 2015

Suangtuahna Mitthla...


Pathianni zan ani a, thla a eng em em mai a, Biak In tual velah chuan naupang inkhawm tur te pawh Biak In dar a la rik loh avangin an infiam nak nak a. Mipa tleirawl rual ho pawh kawngpui ah inkhawm turin thiante nen an rawn in zui chhuak dam dam a. Biak In dar a ri ta va va, inkhawm tur in Biak In lam panin an inzui chho ta tham tham a. Biak In kawt a zun in ah chuan zunram thiar turin an pengkawi leh phawt a. Chu thla eng chuan Hmuifangtlang pang leh Tlangtla ruam te, Sunhlumual te chu mawi em em hian a en paw riai a, chu tleirawl rilru thianghlim tak rirlu ah chuan ngaihbik tur em em pawh awm chuang lovin thla eng in a chhun ralkhat a mawi em em a lang paw riai a thil hmuh te chuan kum tam a la vei a, tulna avangin heng hmun te hi awmbo san ala tul ang a, tuna a thil hmuh te hian a lung a la ti leng thin ang tih hriatthiamna in a rawn thawk a. A zunram thiar zo pawna a chhuak chuan Biak In tual atanga lang thei Hmunchung tlang a han hawi chho leh a mawi em em in thla eng chuan tlang pang vel chu lungti leng tawk lekin a lo chhun paw riai bawk a. Tlang pang leh vengchhak lama in te chu mawi em em in lang paw phet a, chu mi zana rilru ah chuan engdang a leng lo.

Biak In inkhawm an bang a, mut hmunah pawh hmalam hun tur a ngaihtuah a, a kum leh ah chuan khawpui lamah a zirna chhunzawm a lo tul tawh ang a, naupan tet atanga alo seilenna khua chhuahsanin hmun hran ah a awm hun chuan hriat chhuah chang a la awm ngei ang. A vanneih phei chuan Zoram piah lam ah te a awm chhuah ala tul ve ang a, suangtuahna mitthla bak in chu hmun lunglen thlak em em te chu a hmu thei tawh awm silova...mi pangngai anih chuan lunglenna thlarauvin pawl changte a la nei ve ang a...khawtlang lunglen an tih ang tal hi chuan ala ti buai ve ngei awm si a.

Chawlh hmang emaw hun rem changah a seilenna khua pana haw chang te ala nei ang a, hman a thla eng erawh a danglam lovang a, a eng mawi takin a chhun hmun leh ram te chu a danglam tawh ngei ang! a luahtu mihring te pawh an danglam ang. Hmana ngaihbik em em pawh nei lova lungleng em em a thlir thin hmun leh hma luah lum thin tu te khan a rilru hriatpui ve chuang miah lovin an lo rauh san tawh ang a, chutah zet chuan a thil hmuh leh hriat tam tak te chuan suangtuahna mitthla a la rawn chang ang a...hman leh tun khawvelah hruai luh in ala awm ve ang a. Engkim hian hun leh hmun an lo nei a, mihringte pawh zawi zawin kan lo danglam ve zel thin alo anih hi mawle!

"Huiva len thiam ah chang ila,
Hlimlai ni ka tawng mahna;
Perkhuang tingtang ri mai pawh hian,
Suihlung a ti leng emai.
Aw khawnge maw in awm tak le,
Zai vawra suihlung rualpui,
Nang zawng nunhlui mual liam ta la,
Dam takin mangtha le...."

No comments:

Post a Comment