Turnipui kan dodai

Ti ve khang lang ila kan naupan ve deuh lai chuan ka Nu leh Pa te hi zaipawl lamah a tel ve thin avang in zaipawl audio cassette hi kan ngaihthla nasa thei khawp mai a, chumi avang chunge ka hre lova Pathianni tuk a lo thlen hi chuan rilru ah zaipawl zai ngaihthlak hi a lang tlat zel tun thleng hian. Chulam phei chu ka sawi tum ani hauh lova, he hla 'Turnipui kan dodai'  tih hi Pachhunga University College a lehkha ka zir ve laiin Evangelical Union ten sumtuak nan tiin Mizo Academy of Letters(MAL) hovin Vanapa Hall, Aizawl  a Annual Conference an neih tur ah opening song sa turin kan adviser ten inhlawhna ni pahfawmin hun remchang deuh min hmuh sak a, EU memberte chuan phur takin hla kan zir ta a. Tv.Ms-a leh Tv.Rozuala te kaihhruaina hnuaiah he hla ngei mai hi Block-II building ah kan sa ve thap thap thin a, college tukverh atanga lang Eucalyptus leh Asoka Tree thingkung kara ITI veng leh Mualpui rama mihring leh In vel lo lang tiar thin te kha he hla ka hriat apiang hian mitthla ah a lo lang leh thin. Lung an ti leng thei mai dawn alawm le!

He hla hi tha ka tihna em em chhan pakhat chu Mizo nun abikin thingtlang mite nunzia a phawrh chhuak tha lutuk hi a ni. Thingtlang ah chuan sawrkar hnathawk leh dawrkai te nih lem loh chuan lo neih bak thawh tur a awm chuang lova. Mitam zawkin lo neih in ei an zawng a, a hlathu chang hmasaber a sawi ang hian lovah an feh a, nilenga hlothlo in hna an thawk a, mahni chhungkua chauhva thawk lovin a chang chuan thian te an sawm khawm a 'lawm an ruai' thin a ni. Loneitute chuan thlam namthlak atangin an buhhmun chu an han thlir a, vau lamah sava an lo hram lauh lah bawk a, piah leh deuh ah zotui thiang luang ri her her hriat tur a awm bawk a, hnathawk chau pawh nise an dam huai huai thin a ni. 

An tan chuan lo chu an office a ni a, an thinlung an ngaihtuahna zawng zawng chutah chuan a awm ti ila kan sawi sual tam vak lo mai thei. Lawm rawih ni te phei chuan hlothlo in an bung tlar put thin a, vau atangin  thlifim a rawn thaw heuh heuh a, chu chuan nisen sa tak hnuai a boruak lum upa tak chu a rawn chhawk zangkhai thin a ni. Lawmrual hlothlo te in turin an zinga nula awm te chuan a khat tawkin tui in tur tuithawl in an rawn sem thin a, hlim takin fiamthu leh nuihza chi hrang hrang nen ni an vui liam za thin a ni.

Chutia kumtluan a hlo an thlawh chu kumtawp lamah buhseng a lo hun a, a kum leh ah chuan ram hran an bawh a lo tul a, hmun hran daiah te thlawhhma(buhhmun) an nei leh thin a ni. He hla chang tawpna ber ah hian chiang takin a sawi a; hlim taka hah pawh sawi lova thiante(lawmrual) nen  a hlo an thlawh na hmun an lo(buhhmun) chu a kum leh ah chuan chul ram a lo ni tawh ang a, an lo neihna hmun zau khat ah te a nih tawh loh chuan tuna in lawm ho zingah pawh lawm dangte neiin an inthen darh a lo tul tawh ang a, a ngaihawm duh dawn mange tiin a hla hian a tlang a kawm a ni. Lo nei a nitin a hlothlo tan chuan mahni lo hlui leh vau vel hmun hma te hian lung a ti leng thei thin khawp mai. Kumtluana an lo chettlat na hmun kha ani a, abikin nula leh tlangval te tan phei chuan khawpui lamah park/restaurant vela in ngaizawngte an in date thin ang deuh hian lawmrawih ni te hi  in date  na atana hun remchang an neih ve theih a ni a, a hlimawmin a lunglen thlak thin ngawt hian ka ring thin. Khawvel hmundang an ngai bik lova, an tan chuan kumtluana an liamna hmun sawmfang(lo/buhhmun) hmun chu hlimna leh hlawhtlinna hmun a ni thin a ni.