Monday, July 6, 2020

Mizo thawnthu zirtir nei tha: Alu, Artui leh Coffee mu atanga hringnun chhiar dan

(Mizo motivational story)

Vawi khat chu rawlthar pakhat hian a pa hnenah chuan a nun hahthlak a tih thu leh engtia awmzel tur nge a hriatthiam loh thu a hrilh a. A nun chu harsatna hmachhawn leh hrehawm ti reng rengin a hmang a, harsatna a kiang chiah tihah a harsatna dang hmachhawn tur a rawn kal zel thin a ni.

A pa chu eisiam thiam a ni a, a fapa chu chokaah a hruai ta a. Bel pathum a la a, a chhungah chuan tui a dah khat vek a, mei chungah a chhuang ta vek a. Bel pathum a tui te chu a rawn so tan ta tihah chuan bel pakhatnaah alu a dah a, bel pahnihnaah artui a dah a, bel pathumnaah chuan coffee mu a dah thung a ni.

A fapa bulah chuan engmah a sawi lo in chung bel te chu an rawn so bawrh bawrh hun lo en reng turin a hrilh a, an pafa chuan bel a tui rawn so bawrh bawrh chu ngawi rengin an nghak dun ta a ni.

Minute 20 hnuaah chuan a pa chuan bel te chu a suan ta vek a, bel atang chuan alu leh artui chu a lachhuak a, a hrang ve ve in thlengah a dah a. Coffee mu erawh kha chu a fe thlitna hmangin a tui a la chhuak a, noah a dah ta a.

A fapa hnenah chuan enge i hmuh tak le? tiin a zawt a. A fapa chuan "Alu, artui leh coffee mu" tiin a chhang a.

A pa chuan en hnai deuh la, alu kha han khawih chhin teh a ti a, a han khawih a, a lo nem vek tih a hrethiam a. Artui chu a khawih tir leh thung a, mahse artui hawng chu a lo sak veng thung a. Artui chu a hawng chhu keh turin a hrilh a, a hawng a kheh pawh chuan a chhung lam chu a lo la  khal vek tho a. Chumi hnu chuan coffee, tui no a dah chu in turin a hrilh a, a han in a, a rim a tuiin a in a nuam em em a. A fapa chuan a pa hnenah chuan, "Ka pa, thil min tih tir hi enge a awmzia ni ta?" a ti a.

A pa chuan ti hian a hrilh fiah ta a: Alu, artui leh coffee mu te khan an hmachhawn ngai loh harsatna inang vek tui so an hmachhawn a, mahse, an dawnsawn dan a inang lo vek a ni. Alu kha tuiso a thlak hma khan a sak a, mahse tuisoah kha a nem ta vek a, artui chu keh awlsam em em, a hawngin a tuam der der chauh a ni a,  mahse tuiso a thlak chuan a lo sak in a khal ta em em a ni. Tin, coffee mu pawh kha a tir kha chuan thil mu pakhat kha a ni mai a, mahse, tui so a thlak anih hnu khan tui rawng a rawn thlak a, thil rimtui em em a rawn siam chhuak ta a ni.

Ka fapa duhtak, heng thil 3 zingah hian a eng ber nge i nih ve dawn le? Harsatna in i kawngka a rawn kik chang in, engtin nge i lo hmachhawn thin le? Alu, artui leh coffee mu ah khan a khawi ber nge i nih ve dawn le? tiin a hrilh ta a.

Thian duhtak, kan nunah hian thil chi hrang hrang hi a thleng reng a, harsatna te pawh a thleng fo thin. Pawimawh ta ber zawk erawh chu, chung harsatna te a lo thlen chang chuan keimahni theuh hian engtin nge kan lo hmachhawn thin tih hi a ni, alu, artui leh coffee mu ten harsatna an hmachhawn dan kha i hrereng thin dawnnia.

A video ngaithla duh tan:

Wednesday, July 1, 2020

Mizo thawnthu zirtir nei tha: Hringnun ro phum ruk thawnthu

(Mizo motivational story)

Hmanlai hian mifing tak pakhat hi a awm a, amah chu an chenna khaw hotu a ni nghe nghe. Mi zawng zawng in an zah a, a thil thlir dan te, a ngaihdan te pawh an zawm tha thin hle a ni. A thurawn la turin mi tam tak ahnenah chuan an rawn kal fo thin a ni. A fapa ve thung erawh chu a thatchhe hle a, a hun tam zawk chu mut bo nan leh thian kawm nan bak a hmang ngai lo. Zilh emaw vau pawh in a nunah awmzia a nei lo a, thu thusawi mah a zawm ngai lo a ni.

Hun leh kum te a ral zel a, a fapa chu a rawn thang lian ve zel a, a pa chuan a fapa hmalam hun tur chu a ngaihtuahin a lungngai thin hle a ni. A fapa chu a hmalam hunah chhungkua te a la din ve ngei ang a, chumi hun atan chuan atan leh a nupui fanau te tana thil tha tur tih tir ngaiin a hre ta a.

Nikhat chu a fapa chu pindanah a ko a, ti hian a hrilh ta a, "Ka fapa, tunah chuan naupang chhia i ni tawh lo a, mawhphurhna lak dan i inzir ve a ngai tawh a, nun awmzia te pawh i hriatthiam a hun ve tawh a ni. Chuvangin, i damchhan awmzia dik tak hre turin ka duh che a ni. Chu chu i hmuhchhuah hunah chuan, hlim leh lawm takin, kumkhua in i awm thei ang tih hrereng turin ka hrilh a che." a ti a.

Chumi hnuah chuan a fapa chu ip pakhat a pe a, a fapa chuan chu ip chu a han hawn chuan mak a ti hle a, a chhungah chuan sik leh sa inthlak hun apianga hak tur thawnhmaw pali a lo awm a. Chubakah chuan, chaw atana siam mai theih chi thlai rah leh thlai mu nei chi te, pawisa tam vak lo leh map te a lo awm tel bawk a.

A pa chuan a fapa hnenah chuan, "Ro phum ruk va zawng chhuak turin ka duh che a, chu ro awmna chu mapah khan ka ziak lang a, i va kal a, i zawnchhuah nei a ngai a ni" tiin. A fapa chuan a pa thil sawi chu lawmawm a ti em em a. A vawi khatna atan a pa chuan a chungah ngaihdan tha tak a nei tih a pawm ta hial a ni. Chutichuan, a tukah chuan fapa chu phur takin ro phum ruk zawng chhuak tur chuan a chhuak ta a. Zin kawng thui tak a kal angai a, ramri, ramhnuai leh tlang sang tak tak te a paltlang a ngai dawn a ni.

A kal ta zel a, thla tam tak a ral ta hial a. A kalkawngah chuan mi chi hrang hrang a hmu a, a then chuan chaw te an lo pe a, a then pawhin riahna an lo siam sak a. A chang leh amah lo rawk tum suamhmang te a tawk a, thenkhat lahin bum an lo tum bawk a. A kalkawngah chuan mihring te chunga thleng thei thil tha leh tha lo a tawng hnem ta khawp mai.

Sik leh sa a rawn in thlak a, ram leilung awmdan pawh a lo danglam chho a. Khua a that loh ni chuan a chawl thin a, khua a that ve leh a kal chhunzawm leh thin a ni. Thla tam tak a kal hnu chuan, a thlenna hmun tur chu a va thleng ta a, a awmna chu kham a lo ni a. Map chu a han en ta vang vang a, ro phum ruk awmna chu kham hnuai a thingbuk hnuaiah awm niin a inziak a. Khamah chuan a uai thla a, thingbuk hnuai chu a lai ta a, thuk takin a lai a, mahse engmah a hmu lo, a sir vel te, a chung lam te chu a han en a, mahse ro phum ruk chu a hmu zo ta chuang lo a ni. Ro phum ruk zawng chuan ni hnih ngawt chu hmunah a awm a. A ni thumnaah chuan a lo chau tawh nen, hawsan mai a tum ta a ni.

A pa chuan dawt a hrilh niin a ngai a, a lunghnur hle a, lungawi lo zetin an khaw lam pan chuan a kal let leh ta a. A haw kawngah chuan a kal lam ang bawk khan sik leh sa inthlak te, ram leilung in ang lo tak ta te a hmu leh a. Amaherawhchu, hemi tum hi chuan thal lai a pangpar par mawi tak tak chu a hmuh chuan a chawl khawmuang ta thin a ni. Fur khawthiang a sava mawi tak tak an hram te chu ngaithla in a chawl leh veng veng thin a. Tlai lama kawlkil a ni tla tur mawi tak tak te chu hlim takin a thlir fo thin a ni.

A haw kawngah chuan a kal zel a, a pa in eitur a pai pawh kha a ei zo tawh a, a ei tur zawngin thlai lakkhawm dan te sapel dan te a zir pah zel a. A thawmhnaw tet thui dan te, zana riahna tur buk siam dan te pawh a zir thiam ta thuai a ni. Ni awm dan atangin hun chhiar dan a zir thiam a, chutiang zel chuan nikhat atan a kal theih tawk tur pawh a hisap thiam ta thuai a ni. Ramsate laka inven dan te pawh a hrethiam tawh em em a ni. 

A kal zel a, a kal lama amah lo tanpuitute kha a va hmu leh hlawm a, haw lam te a ni bawk a, an bulah chuan a cham a, a theih ang angin a pui let ta hlawm a ni. Amah ang khualzin naran, engmah pawh pek let tur neilo nimahse, a chungah that an chhuah chhunzawm zel te chu a hmuhin mak a ti ta hle a ni.

Tichuan, an khua pawh a thleng dawn ta reng mai, an khawdai a thlen chuan a chhuahsan na kha kum hnih lai a lo liam tawh tih a hrechhuak a. In a thleng ta a, a pa pindanah chuan a lut tlang nghal a. A pa chuan a lo hmuhin a lo kuah a,  a zinkawngah a tluan leh tluan loh te, ro phum ruk chu a hmuh leh hmuh lo te a lo zawt a.

A fapa chuan, "Ka pa, ka zinkawng chu a nuamin a dangdai hle a, mahse, min ngaidam rawh, ro phum ruk i sawi chu ka hmu chhuak thei ta lo a ni, ka kal hma khan midangin an lo la tawh aniang" a ti a. A thil sawi chu amah leh amah pawh mak a inti a, a pa lakah chuan a thinrim teh reng nen khan abul a thlen chuan thinrimna reng reng a nei tawh lo a. Thinrim a hnekin a pa lakah chuan ngaihdam a dil ta zawk a ni.

A pa chuan nui var var chungin "Ka fapa, a hmun ka sawiah khan ro phum ruk reng reng a awm lo a sin" a ti a. A fapa chuan, "Chuti ni si engatinge zawng tur a min tirh si?" a ti a. A pa chuan, "A chhan chu ka hrilh ngei ngei ang che, mahse, ka hrilh hma che in i zinkawng chanchin te, nuam i tih leh tih loh te min hrilh hmasa phawt rawh" a ti a.

A fapa chuan, "Ka kal lam kha chuan nuam  ka ti miah lo, ro phum ruk chu miin min lak khalh ang tih ka hlauh avangin hmanhmawh reng rengin ka hun ka hmang a. Mahse, ka rawn haw leh lam chuan nuam ka ti hle a ni. Thian thar tam tak ka rawn nei a, nitin thil mak tam tak ka rawn tawng a ni ber e. Dam khawchhuahna na turin thiamna leh thil tih dan tam tak ka rawn zirchhuak bawk a ni. Chung ka thil hriat leh thiam thar te avang chuan ro phum ruk chu hmu lo mah ila inchhirna ka nei hran lo a ni" a ti ta a.

A pa chuan, "Ka fapa, ka va lawm em, kha tak kha a lawm ka tirh chhuah chhan che, thlenna tur hmun a thleng turin ka duh che a, mahse, chu i thlenna tur chauh a i rilru zawng zawng i pek chuan hringnun a ro hluber awm hi i tawng  ngai dawn lo a ni. Thudik chu hei hi a ni, hringnun hian tawnhriat neih belh zel chungin nitin a  than len mamawh a, chu bak thlenna tur bi tuk sa dang a nei chuang lo" a ti a.

"Nun kan neihna chhan hi nitin a tawnhriat nei tura duan kan nih vang a ni a, chu kan thil tawn apiang chu hmang tangkai a, phur tak leh huaisen taka hmachhawnin, tawng belh leh zel tur a inbuatsaih hi mitin mamawh chu a ni."

Thian duhtak, i thil tawn apiang kha, i tan a tangkai tur leh, awmze nei a ni zel tih hrethiam thin ang che aw!

A video en duh tan:

Tuesday, June 30, 2020

Mizo thawnthu zirtir nei tha: Nun laklawh a tang

(Mizo motivational story)

Thailand rama khualzin pakhat chuan a vahvelnaah sai awmna hmun pakhat a va thleng hlawl mai a. Saite chu a va hmuh chuan a rilruah thil pakhat a rawn lang hlawl mai a. Chu chu hei a ni, chutiang ramsa lian em em mai te chu an ke pakhatah chuan hruizen te tak te hian an lo hling bet thei chu a ni. An ke phuar nan chuan thir khaidiat emaw ramsa khungna tur a siam bawm pawh an hmang si lo a.

Thil lang chiang ta deuh mai chu, saite chuan duh nise, an ke an phuarna atang chuan an duh hun hunah an tal chhuak thei tur a ni a. Mahse, chhan tha tak avang in an tal chhuak lo a ni.

Khualzin chuan a bul hnaia sai enkawltu lo awm chu ava bia a, engvang a chung saite chu tlanchhuah pawh tum lo leh thuawih taka an awm theih na chhan chu a zawt a.

Sai enkawltu chuan, "Aa..englo ania, heng saite hi an la naupan lai leh an taksa pawh a la tet lai khan, heng hruizen a len dan pawh ngai reng hian kan hling thin a, chutiang ang tiat an la nih lai chuan an mahni hlin behna atan a tawk em em thin a ni. Chutichuan, an rawn thang lian zel a, an rilruah heng hruizen te hi an ti chat thei lo tih hrethiam thei turin kan thunun tlat thin a ni. Lian tawh hle mahse, hruizen hian a la thlung bet tlat thei tih an ring nghet hmiah tawh mai a. Chuvangin, talchhuah an tum ngai lo reng reng" a ti a.

Khualzin chuan mak a ti em em a. Heng saite hian tum tak tak se an duh hun hunah an talchhuah nghal thei tur a ni reng si a. Nimahsela, an mahni hlingtu hruizen atang chuan an tal chhuak thei lo tih an in ringnghet tlat tawh a, an tan tlanchhuah ngaihna a awm lo a ni.

Hringnunah hian heng saite ang mai a nun hmang mek hi engzat tak awm ang maw? Kan rilruah hian engemaw ti ve thei lo tlat inngaihna kan nei thin. A chhan ho tak chu, a tih a kan tih hma hauh a kan beidawn nghal thin vang a ni. 

Chuvangin thian duhtak, i hun kal tawh a bahhlahna leh phurrit i lo tawh te avangin hmalam pan a i kalna tur chu dal tirin awm suh se. Hun kal tawhah i lo hlawhchhamna chuan i hmalam hun kawng chu, a ti bahhlah tur a ni lo. Nangmah ngei mai kha phur tak leh a tha zawnga  rilru pu chungin, hmalam panin ke pen rawh le. 

Ti hian in fuih la, engpawhnise ka bei ve hrim hrim dawn a ni ti la, i thil beihah chuan rilru zawng zawng in ti la, zau takin meng la, tawp chin a awm tur a ni lo tiin thawk ang che. 

Chu i beihna kawngah chuan nangmah ngei pawh a tha lo zawng a rilru pu lo turin in khuahkhirh tlat ang che. Zalen takin awm la, thil thar beih tum la, mithar kawm la, he kan khawvel ram zau tak hi han thlir kual chhin teh, theihna a awm a ni tih hmuchhuak ang che.

A video ngaithla duh tan:

Monday, June 29, 2020

Mizo thawnthu zirtir nei tha: He intlansiakna hi hringnun chu a ni

(Mizo motivational story)

Vawi khat chu tlangval pakhat tlanchak deuh mai, hlawhtlin chak em em hi a awm a. Atan chuan hnehna chan chu tih ngei ngei ngai a ni a. Hlawhtlinna pawh hnehna chan atanga chauh a neih theih chiah a ngai a ni.

Nikhat chu chu tlangval chu intlansiak naa tel turin a inbuatsaih ta a. An chenna thingthlang khaw tetakte atang chuan amah leh midang pahnih te nen intlaksiaknaah chuan tel ve an tum ta a.

Intlansiakna hmunah chuan mipui tam tak a en turin an rawn pungkhawm a.  Tlangval tlanchak deuh a tel ve dawn tih hria in, an zingah chuan putar fing deuh mai pawh intlansiak en tur chuan a rawn kal ve vang vang a.

Intlansiak chu an han tan ta a, a tawp thleng tur chuan chak taka tlan angai a ni tih alang reng mai a. Tlangval chuan theihtawp a chhuah a, a insangphek a, a chakna thahrui zawng zawng nei a bei a. Tichuan a tawp a tlan thleng a, pakhatna ava ni ta a. Mipuite chuan tlangval chu an lo au dur dur a. Putar fing deuh kha erawh chu a ngawi reng a, a chechang ve reng reng lo a. Tlangval erawh chu a inchhuangin chak a inti hle thung a.

Intlansiak vawi hnihna an han ko leh a, tlangval nen a tlan tlang turin midang pahnih chak tha deuh an rawn penchhuak ve leh a. Intlansiak chu an han tan leh ta a, a hma ang bawk khan tlangval khan a tawp a thleng hmasaber a, pakhatna a va ni leh ta a. A hma ang bawkin mipui te chuan tlangval chu lo lawmpuiin an lo au leh ta dur dur a. Putar fing deuh kha erawh chu a hma ang tho in engmah sawi lo in a thu ngawi reng zel a. Tlangval pawh hnehna a chang leh chu a intitheiin, chak a in ti leh hle mai a.

Tlangval chuan "tlan leh ka la duh" tiin a huaihawttu te chu a ngen a. Putar fing deuh chu a rawn kalchhuak a, tlangval tlanpui turin mi pahnih - pitar derdep tak leh mipa mitdel a rawn kai chhuak a. Tlangval chuan a lo hmuh in "Enge a awmzia? heng te chu intlansiak pui chi an ni dawn em ni?" tiin a rawn tawngchhuak a. Putar fing deuh chuan "Intlansiak tlang rawh u" tiin a chhang mai a.

Tichuan, intlansiak chu an han nei leh ta poh a, a hma ang bawkin tlangval chuan hnehna changin a tawp thleng thei awmchhun a ni a. A tlanpui tura an tih mi pahnih te erawh kha chu tlan pawh tlan lo in tlan tanna hmunah chuan an lo la ding reng a. Tlangval chuan nuam ti tak leh phur em em hian a ban a rawn phar chhuak a. Nimahsela, mipui lam chu Tlangval tan an rawn au chhuak ta miah lo mai a. Tlangval chuan mak a tih em avangin putar fing deuh hnenah chuan "Eng thil nge thleng ta? Mipui ten engatinge min au sak tak miah loh ni?" tiin a va zawt a. Putar chuan "Intlansiak nawn leh ula, tun tumah chuan in pathumin a tawp thleng rual ang che u" tiin a lo chhang a.

Tlangval chu a inngaihtuah ta thut a, pitar leh mitdel pa inkarah chuan ava ding a, an pahnih ban tawn tawnah chuan a kai a,  muang changin an pathum chuan intlansiakna thlen chin tur tawp chu an pan ta a, a tawp a tawpah chuan an thleng thei ta hram a ni. Mipui te chuan chu chu an hmuh chuan a hma aia nasa leh zual khan an rawn au ta hluah hluah mai a ni. Putar fing deuh chu a rawn nui ta var var a, tlangval pawh chuan nuam a tiin a inchhuang hle a. "Ka pu, ka hriatthiam loh thil a awm, mipui te hi kan pathum zingah hian tu tan ber nge an rawn au hluah hluah le?" tiin tlangval chuan putar chu a zawt a. Tlangval dar a beng thak thak chung chuan putar chuan heti hian a chhang a, "Tlangval, he intlansiak tum thumnaah hian a hma a i tlan vawi hnih ai khan hnehna i chang sang zawk a ni, mipui te hi he intlansiakah hian pakhatna tan an au lo a, in pathum tan khan an au a ni" a ti a.

I hringnun ah khan enga tan nge i tlan thin le? Hlawhtlinna neih i chak huam huam thin em? Hnehna chan chauh hi a tehna niin i hre thin em? Tu te nen nge in intlansiak thin? Midang te lakah hnehna i chan reng thin chuan reiloteah mite'n an lawmpui reng thei lo mai ang che. Hnehna i chan lai khan han thlir let leh thin la, i dawtah tunge rawn tlan ve thin tih lo en fo la. Mi chak lo zawk leh kum upa zawk te annih chuan a tawp thleng ve turin i tanpui thin em? A tawp in thleng rual thin em? Mi chaklo zawk te nen a, a tawp thlen rual hi i hringnun a intlansiak i tlan theih zawng zawng a pawimawh ber a ni si a. Tlan zel la, he intlansiakna hi a ni hringnun chu! 

Hei hi erawh hrereng ang che, hnehna i chang em tih hi a pawimawh ber lo a, a pawimawh zawk chu engtin nge he hringnun intlansiaknaah hian i tlan ve thin tih hi a ni. 

A video ngaithla duh tan:

Monday, June 22, 2020

Mizo thawnthu zirtir nei tha: I kawng zawh laiah harsatna awm mahse

(Mizo Motivational story)

Hmanlai hian lal pakhat hian a hote chu kawngah lung lian pui a dah tir a. Tichuan, a sir a thing phenah chuan a biru ta a, a bihrukna hmun atang chuan chu a lung dah tir chu, kawng atanga dah sawn tum an awm leh awm loh a thlir ta a.

Reilote hnuah chuan a lal ram chhung mi chi hrang hrang, sumdawng hausa te, a khawnbawl upa te chu an rawn kal a, lung chu dahsawn tum lem lo in an kal hel mai a, an kal liam leh zel a. An kal pah chuan kawng a lung awm chu, lal in a thenfai tir lo chu tha ti lo in an phun zel a. Nimahsela, an zavai mai chuan, kawng a lung awm chu thenfai tum reng an awm si lo.

Nikhat chu, chu kawngah chuan loneitu pakhat hi a thlai thar te phur bawr luih chungin a rawn kal ve a. Kawng a lung lo awm chu a hmuh chuan, a phur chu a nghat a, lung chu kawng thlang a nam sawn tumin a bei ta chiam mai a. Theihtawpa a beih hnu chuan, lung chu kawng thlangah chuan a nam liam thei ta a.

A thil rawn phurh chu phur leh tura a insiam lai tak chuan, lung a lum sawnna hmunah chuan pawisa ip (purse) a lo let reng tih a va hmu a. Pawisa ip chu a va enchiang a, a chhungah chuan rangkachak leh Lal lehkha ziak a lo awm a. Chu lehkhaah chuan rangkachak chu lung lumsawn tu ta tur a ni tih a lo inziak a.

Hringnunah hian harsatna kan chunga a lo thlen chang hian, kan tan remchanna tur thil dang a rawn keng tel thin a ni. Chu remchanna chu kan thil tawn atanga hmasawnna chharna tur te, insiamthatna tur te a lo ni thin. Mi thatchhia chuan chung thil a lo thlen chuan, a sawisel mai thin a, mi thenkhat ve thung erawh chuan rilru zau tak pu in, hrethiam tak leh chhel takin remchanna an lo neih phah zawk thin.

Chuvangin eng harsatna pawh lo thleng sela, remchanna rawn ken tel a nei ngei ang tih ring la. I tan a hmasawnna tur leh, than zelna tura remchang a ni dawn tih hrethiam thin ang che.

A video ngaihthla duh tan hetah hian en theih a ni e:

HRINGNUN ZIRLAI: HMEICHHE PAKHAT SA SEMCHHUAHNA HMUNA THAWK CHU

Ni khat chu hmeichhe pakhat sa semchhuahna hmuna thawk hi, a hna thawh tur a thawh zawh hnu chuan sa dahthatna/dahvawhna pindanah chuan va e...