Tuesday, September 21, 2021

Mizo short sermon article: "Rabboni, hmuh theih ka duh"

- Dr. Lalzarzoa, Kawnveng, Sialsuk

Chang thlan: Isuan a lo bia a, “Eng nge tihsak che ila i duh?” a ti a. Mitdel chuan, “Raboni, hmuh theih ka duh,” a ti a. Tichuan, Isuan, “Kal rawh le, i rinna i dam phah a ni e,” a ti a. Khua a lo hmu thei ta nghâl mai a, kalkawngah chuan a zui ve ta a. (Marka 10:51-52)

Khawvela kan awm chhung hian thil hrang hrang te tawngin, kan nunah hian thil chi hrang hrang a rawn thleng thin a ni. Ka taksaah ngei pawh hian a chang chuan chak loh chang te, hrehawm chang te, nawmsam loh leh natna te a thleng fo thin. Mi thenkhat te phei chu pian tirh ata mitdel te, tawng thei lo te, bengngawng te, zeng te a ni thin. A dam pangngai a piang te pawh taksa natna in min chim fo thin. Kan tunlai khawvel hun tawn mek te pawh, kan hriat theuh angin hripuiin min run mek a nih hi. Damna kan zawng a, dam theih na turin kan bei a, damna duhin kan inseng so bawk thin.

Damna chan duh tu chu han ngaihtuah ta ila, a mawlmang thei angbera sawi dawn chuan damlohna engemaw chu a nei tihna a ni. Sawi dan dang lehah chuan tihdam ngai a ni tihna pawh a ni thei. A nih loh vek pawhin tina tu a tawng emaw a ni tihna a ni.

Damlohna emaw chaklohna nei te chu taksa lam natna emaw rilru lam te, thlarau lama hliam tuar te anni thin. Chung ang dinhmuna awm te tan chuan tidamtu neih an mamawh a, tidamtu an zawng a, an pan thin a ni. Damna kan zawnna kawngah hian kan rilru sukthlek dan erawh a inang lo thei viau awm e.

Bibleah hian damlo, khaweng pawh hmu thei lo va mitdel Bartimaian Isua hnena damna a zawn dan hi a ropuiin a entawn tlak ngawt mai. Lal Isua leh a zirtirten Jeriko khua an lo thleng a, mipui an tam em em a, chung ang karah chuan Isua chu va hmuh emaw va pan pawh harsa tak tur a ni. Mahse, Bartimaia chuan kawngsira kutdawha a thutna atang chuan ring taka auvin "Isu, Davida Fapa, min khawngaih rawh" a ti a. A au thawm hria mi tam takte chuan ngawi turin an hau ta hial a, nimahsela, a ni chu a beidawng duh lo, a hma aia nasa in a au zual ta sauh sauh zawk a ni.

Isuan Bartimaia chu han ko turin a ti a, ani chuan a thutna atanga zuang thovin Isua hnen lam chu a pan ta a. Isuan Bartimaia hnenah chuan "Eng nge tihsak che ila i duh?" tiin a zawt ta a. Mitdel Bartimaia chuan eng danga chhang ta lo chuan, "Rabboni, hmuh theih ka duh," a ti a. Tichuan, Isua chuan, "Kal rawh le, i rinna i dam phah a ni e," a ti a. Khua a lo hmu thei ta nghâl mai a, kalkawngah chuan a zui ve ta a.

He laia Mitdel Bartimaian rinna tak tak nen a tidamtu Isua hmuh a duh thu a sawi chhuak hi a ropui ka ti thin ngawt mai. Keini hi chuan hrileng kan ning a, damna chu kan duh a, mahse, tidamtu chu a hmel hmuh erawh kan chak phah chuang thin lo a ni lawm ni?

Bartimaia nunah hian entawn tur tam tak kan neiin a lang. Damna a chan theih nan miten an khap chung pawhin Isua chu a au va, khap hneh theih pawh a ni lo. A au thawm chuan Isua beng a thleng ta a nih kha, chumi ahnuah damna a chang chhunzawm ta nghal bawk. Kan natna te,  kan harsatnate, kan chaklohna zawng zawngah te hian 'Rabboni hmuh chak khawpin' Isua hi kan be pawp ve ngai em le? Chu chang a ni lo, kan chang tarlanah hian han en ila, damna a chan rual rualin a tidamtu Isua chu a zui ve nghal tih kan hmu bawk. Damna chang a ni mai lo va, a dam rualin Isua a zui ve nghal tih thu pawh hi keini ringtute hian kan entawn ngei ngei tur zing a mi a ni bawk a ni.

Kan hun tawn mekah pawh hian hri hlauhawm tak a leng mek a, heng harsatna rampuma kan tawh mek lai hian, tidamtu Isua hi "hmuh theih ka duh" ti khawpin kan au ve lawm lawm tur a ni dawn lawm ni? Mitdel Bartimaia kha chuan a mitdel chung pawhin 'Rabboni' kha hmuh a dut tlat si. Hawh u, hun harsa tak kan tawh lai mekah pawh hian chu 'Rabboni' ngei mai chu kan thinlung zawng zawngin hmuh i duh ve tlat ang u. 

Pix courtesy: https://www.seasdunkirkny.org/blind-bartimaeus-mark-1046-52/





Wednesday, February 3, 2021

U.N.O TIH KAN SAWI A, A "O" LAI TAK HI!

- Dr. Lalzarzoa

Mizo te hian international politics leh khawvel zau zawk thil thleng kan hmuh emaw kan sawi hian "U.N.O" hmalakna emaw U.N.O ah thlen a ni ang tih ang chi te hi kan sawi fo thin. Mizoram buai lai te phei kha chuan kan nu leh pa rual hoah phei chuan an titi ber pawh kha "Kan ram zalenna tur chu U.N.O in a rawn pawm hunah" tih ang chi te a ri zing hle awm e.

Mizo ten U.N.O kan tih tak hi internet search engine velah ka han thlir kual a, mi tam tak pawhin U.N.O an lo tive tho mai. Mahse, United Nations official website ah chuan keinin a U.N.O kan tih a tawp a 'O" in a lampum ve tur "organization" lai hi a awm ve hauh lo mai a, United Nations tih hlirin an ziak a ni ( hei hi en ta ila: https://www.un.org/en/sections/history/history-united-nations/index.html ) . Hei vang hi aniang sap media leh tuipuiral lam thutharah te hian keinin U.N a "O" lai kan lam tel thin hi a tel ve ngai meuh lohna chhan ni turah ka ngai.

Chutiang a nih si chuan keini ho hian engtia U.N.O ti si nge kan nih tak ang le? Keia hriatna chuan a hrechhuak zo pha hauh lo a, internet search engine ah bawk chuan ka han zawng leh ta a. Chutah chuan Quora website ah hian mi pakhat chuan hetiang hian a ziak a: He pawl hi a din tirh ni atangin 'United Nations Organization' tih a ni ngai lo hrim hrim a, a pawl hmingah hian a saptawng chuan "The United Nations" emaw "The Organization" ti a sawi thin a ni a ti. Kum 1945 a San Francisco khawpui a ram 50 hruaitu kalkhawm ten he pawl an din dawn khan B.B.C chuan an news report ah khawvel huap pawl din a ni a, chu chu a hming atan "United Nations Organization" a ni e tiin an puang a, chu chu a bikin saptawng hmang leh British awp ram teah B.B.C thupuan chu lo hria in U.N.O kan ti ta sup a ni awm e. British awp ram chhung mi te tan chuan B.B.C chu saptawng chanchinthar an hriatna ber a niha vang leh keini pawh chutih lai a British awp India a kan la awm avangin "U.N" ti lo a "U.N.O" kan tih kher na chhan hi a lo mawh hran lo e.

Mithiam te sawi na thlir chungin han sawi chhunzawm ta zel ila, Saptawng chuan United Nations (U.N) tih a ni a, French tawng chuan “L’Organisation des Nations Unies” tih a ni a, French tawng an sawi chuan "ONU" an tih daih thung. French tawng an sawi a organization an tih telh nachhan hi an tawng chuan a lam tawi "NU" tih chauh hmang ta se "Saruak" tihna a ni a, chu chu duh lem lo in "L'organization" tih hi an dah tel ta ni awm tak a ni.

Spanish tawng erawh chuan “las Naciones Unidas” tih a ni a, organization tih ang hawi a tel ta chuang lo a ni.

United Nations (U.N) official website ah pawh hian a "O" lai (organization lai tak) hi hmuh tur a awm hran lo in ka hria. U.N history an ziahlan ah pawh hian he pawl din tan dan an ziak a, chutah pawh chuan The United Nations officially came into existence on 24 October 1945" tih a ni a. Keinin a U.N.O kan tih a, a "O" lai hi chu kan lo hriatsual a ni ta mai awm e. U.N website hi va bih ve mah teh u, U.N.O tih in hmu lem lo in ka ring.

Kan hriatna tizauah, he pawl hming "United Nations (U.N)" tih hi January ni 1, 1942 khan U.S President Franklin Roosevelt an a phuah a ni a, chung hun lai chu Indopui II-na hun lai a ni. Chumi pawl hming a phuah chu kum 1945 October ni 24-ah din a ni ta a ni e.

"U.N.O" ti kulh kulh tawh lo in, "U.N" tih mai tur a nih awm chu a. Hun hman nuam vek ule.

May be an image of text that says "UNITED NATIONS"

Monday, July 6, 2020

Mizo thawnthu zirtir nei tha: Alu, Artui leh Coffee mu atanga hringnun chhiar dan

(Mizo motivational story)

Vawi khat chu rawlthar pakhat hian a pa hnenah chuan a nun hahthlak a tih thu leh engtia awmzel tur nge a hriatthiam loh thu a hrilh a. A nun chu harsatna hmachhawn leh hrehawm ti reng rengin a hmang a, harsatna a kiang chiah tihah a harsatna dang hmachhawn tur a rawn kal zel thin a ni.

A pa chu eisiam thiam a ni a, a fapa chu chokaah a hruai ta a. Bel pathum a la a, a chhungah chuan tui a dah khat vek a, mei chungah a chhuang ta vek a. Bel pathum a tui te chu a rawn so tan ta tihah chuan bel pakhatnaah alu a dah a, bel pahnihnaah artui a dah a, bel pathumnaah chuan coffee mu a dah thung a ni.

A fapa bulah chuan engmah a sawi lo in chung bel te chu an rawn so bawrh bawrh hun lo en reng turin a hrilh a, an pafa chuan bel a tui rawn so bawrh bawrh chu ngawi rengin an nghak dun ta a ni.

Minute 20 hnuaah chuan a pa chuan bel te chu a suan ta vek a, bel atang chuan alu leh artui chu a lachhuak a, a hrang ve ve in thlengah a dah a. Coffee mu erawh kha chu a fe thlitna hmangin a tui a la chhuak a, noah a dah ta a.

A fapa hnenah chuan enge i hmuh tak le? tiin a zawt a. A fapa chuan "Alu, artui leh coffee mu" tiin a chhang a.

A pa chuan en hnai deuh la, alu kha han khawih chhin teh a ti a, a han khawih a, a lo nem vek tih a hrethiam a. Artui chu a khawih tir leh thung a, mahse artui hawng chu a lo sak veng thung a. Artui chu a hawng chhu keh turin a hrilh a, a hawng a kheh pawh chuan a chhung lam chu a lo la  khal vek tho a. Chumi hnu chuan coffee, tui no a dah chu in turin a hrilh a, a han in a, a rim a tuiin a in a nuam em em a. A fapa chuan a pa hnenah chuan, "Ka pa, thil min tih tir hi enge a awmzia ni ta?" a ti a.

A pa chuan ti hian a hrilh fiah ta a: Alu, artui leh coffee mu te khan an hmachhawn ngai loh harsatna inang vek tui so an hmachhawn a, mahse, an dawnsawn dan a inang lo vek a ni. Alu kha tuiso a thlak hma khan a sak a, mahse tuisoah kha a nem ta vek a, artui chu keh awlsam em em, a hawngin a tuam der der chauh a ni a,  mahse tuiso a thlak chuan a lo sak in a khal ta em em a ni. Tin, coffee mu pawh kha a tir kha chuan thil mu pakhat kha a ni mai a, mahse, tui so a thlak anih hnu khan tui rawng a rawn thlak a, thil rimtui em em a rawn siam chhuak ta a ni.

Ka fapa duhtak, heng thil 3 zingah hian a eng ber nge i nih ve dawn le? Harsatna in i kawngka a rawn kik chang in, engtin nge i lo hmachhawn thin le? Alu, artui leh coffee mu ah khan a khawi ber nge i nih ve dawn le? tiin a hrilh ta a.

Thian duhtak, kan nunah hian thil chi hrang hrang hi a thleng reng a, harsatna te pawh a thleng fo thin. Pawimawh ta ber zawk erawh chu, chung harsatna te a lo thlen chang chuan keimahni theuh hian engtin nge kan lo hmachhawn thin tih hi a ni, alu, artui leh coffee mu ten harsatna an hmachhawn dan kha i hrereng thin dawnnia.

A video ngaithla duh tan:

Wednesday, July 1, 2020

Mizo thawnthu zirtir nei tha: Hringnun ro phum ruk thawnthu

(Mizo motivational story)

Hmanlai hian mifing tak pakhat hi a awm a, amah chu an chenna khaw hotu a ni nghe nghe. Mi zawng zawng in an zah a, a thil thlir dan te, a ngaihdan te pawh an zawm tha thin hle a ni. A thurawn la turin mi tam tak ahnenah chuan an rawn kal fo thin a ni. A fapa ve thung erawh chu a thatchhe hle a, a hun tam zawk chu mut bo nan leh thian kawm nan bak a hmang ngai lo. Zilh emaw vau pawh in a nunah awmzia a nei lo a, thu thusawi mah a zawm ngai lo a ni.

Hun leh kum te a ral zel a, a fapa chu a rawn thang lian ve zel a, a pa chuan a fapa hmalam hun tur chu a ngaihtuahin a lungngai thin hle a ni. A fapa chu a hmalam hunah chhungkua te a la din ve ngei ang a, chumi hun atan chuan atan leh a nupui fanau te tana thil tha tur tih tir ngaiin a hre ta a.

Nikhat chu a fapa chu pindanah a ko a, ti hian a hrilh ta a, "Ka fapa, tunah chuan naupang chhia i ni tawh lo a, mawhphurhna lak dan i inzir ve a ngai tawh a, nun awmzia te pawh i hriatthiam a hun ve tawh a ni. Chuvangin, i damchhan awmzia dik tak hre turin ka duh che a ni. Chu chu i hmuhchhuah hunah chuan, hlim leh lawm takin, kumkhua in i awm thei ang tih hrereng turin ka hrilh a che." a ti a.

Chumi hnuah chuan a fapa chu ip pakhat a pe a, a fapa chuan chu ip chu a han hawn chuan mak a ti hle a, a chhungah chuan sik leh sa inthlak hun apianga hak tur thawnhmaw pali a lo awm a. Chubakah chuan, chaw atana siam mai theih chi thlai rah leh thlai mu nei chi te, pawisa tam vak lo leh map te a lo awm tel bawk a.

A pa chuan a fapa hnenah chuan, "Ro phum ruk va zawng chhuak turin ka duh che a, chu ro awmna chu mapah khan ka ziak lang a, i va kal a, i zawnchhuah nei a ngai a ni" tiin. A fapa chuan a pa thil sawi chu lawmawm a ti em em a. A vawi khatna atan a pa chuan a chungah ngaihdan tha tak a nei tih a pawm ta hial a ni. Chutichuan, a tukah chuan fapa chu phur takin ro phum ruk zawng chhuak tur chuan a chhuak ta a. Zin kawng thui tak a kal angai a, ramri, ramhnuai leh tlang sang tak tak te a paltlang a ngai dawn a ni.

A kal ta zel a, thla tam tak a ral ta hial a. A kalkawngah chuan mi chi hrang hrang a hmu a, a then chuan chaw te an lo pe a, a then pawhin riahna an lo siam sak a. A chang leh amah lo rawk tum suamhmang te a tawk a, thenkhat lahin bum an lo tum bawk a. A kalkawngah chuan mihring te chunga thleng thei thil tha leh tha lo a tawng hnem ta khawp mai.

Sik leh sa a rawn in thlak a, ram leilung awmdan pawh a lo danglam chho a. Khua a that loh ni chuan a chawl thin a, khua a that ve leh a kal chhunzawm leh thin a ni. Thla tam tak a kal hnu chuan, a thlenna hmun tur chu a va thleng ta a, a awmna chu kham a lo ni a. Map chu a han en ta vang vang a, ro phum ruk awmna chu kham hnuai a thingbuk hnuaiah awm niin a inziak a. Khamah chuan a uai thla a, thingbuk hnuai chu a lai ta a, thuk takin a lai a, mahse engmah a hmu lo, a sir vel te, a chung lam te chu a han en a, mahse ro phum ruk chu a hmu zo ta chuang lo a ni. Ro phum ruk zawng chuan ni hnih ngawt chu hmunah a awm a. A ni thumnaah chuan a lo chau tawh nen, hawsan mai a tum ta a ni.

A pa chuan dawt a hrilh niin a ngai a, a lunghnur hle a, lungawi lo zetin an khaw lam pan chuan a kal let leh ta a. A haw kawngah chuan a kal lam ang bawk khan sik leh sa inthlak te, ram leilung in ang lo tak ta te a hmu leh a. Amaherawhchu, hemi tum hi chuan thal lai a pangpar par mawi tak tak chu a hmuh chuan a chawl khawmuang ta thin a ni. Fur khawthiang a sava mawi tak tak an hram te chu ngaithla in a chawl leh veng veng thin a. Tlai lama kawlkil a ni tla tur mawi tak tak te chu hlim takin a thlir fo thin a ni.

A haw kawngah chuan a kal zel a, a pa in eitur a pai pawh kha a ei zo tawh a, a ei tur zawngin thlai lakkhawm dan te sapel dan te a zir pah zel a. A thawmhnaw tet thui dan te, zana riahna tur buk siam dan te pawh a zir thiam ta thuai a ni. Ni awm dan atangin hun chhiar dan a zir thiam a, chutiang zel chuan nikhat atan a kal theih tawk tur pawh a hisap thiam ta thuai a ni. Ramsate laka inven dan te pawh a hrethiam tawh em em a ni. 

A kal zel a, a kal lama amah lo tanpuitute kha a va hmu leh hlawm a, haw lam te a ni bawk a, an bulah chuan a cham a, a theih ang angin a pui let ta hlawm a ni. Amah ang khualzin naran, engmah pawh pek let tur neilo nimahse, a chungah that an chhuah chhunzawm zel te chu a hmuhin mak a ti ta hle a ni.

Tichuan, an khua pawh a thleng dawn ta reng mai, an khawdai a thlen chuan a chhuahsan na kha kum hnih lai a lo liam tawh tih a hrechhuak a. In a thleng ta a, a pa pindanah chuan a lut tlang nghal a. A pa chuan a lo hmuhin a lo kuah a,  a zinkawngah a tluan leh tluan loh te, ro phum ruk chu a hmuh leh hmuh lo te a lo zawt a.

A fapa chuan, "Ka pa, ka zinkawng chu a nuamin a dangdai hle a, mahse, min ngaidam rawh, ro phum ruk i sawi chu ka hmu chhuak thei ta lo a ni, ka kal hma khan midangin an lo la tawh aniang" a ti a. A thil sawi chu amah leh amah pawh mak a inti a, a pa lakah chuan a thinrim teh reng nen khan abul a thlen chuan thinrimna reng reng a nei tawh lo a. Thinrim a hnekin a pa lakah chuan ngaihdam a dil ta zawk a ni.

A pa chuan nui var var chungin "Ka fapa, a hmun ka sawiah khan ro phum ruk reng reng a awm lo a sin" a ti a. A fapa chuan, "Chuti ni si engatinge zawng tur a min tirh si?" a ti a. A pa chuan, "A chhan chu ka hrilh ngei ngei ang che, mahse, ka hrilh hma che in i zinkawng chanchin te, nuam i tih leh tih loh te min hrilh hmasa phawt rawh" a ti a.

A fapa chuan, "Ka kal lam kha chuan nuam  ka ti miah lo, ro phum ruk chu miin min lak khalh ang tih ka hlauh avangin hmanhmawh reng rengin ka hun ka hmang a. Mahse, ka rawn haw leh lam chuan nuam ka ti hle a ni. Thian thar tam tak ka rawn nei a, nitin thil mak tam tak ka rawn tawng a ni ber e. Dam khawchhuahna na turin thiamna leh thil tih dan tam tak ka rawn zirchhuak bawk a ni. Chung ka thil hriat leh thiam thar te avang chuan ro phum ruk chu hmu lo mah ila inchhirna ka nei hran lo a ni" a ti ta a.

A pa chuan, "Ka fapa, ka va lawm em, kha tak kha a lawm ka tirh chhuah chhan che, thlenna tur hmun a thleng turin ka duh che a, mahse, chu i thlenna tur chauh a i rilru zawng zawng i pek chuan hringnun a ro hluber awm hi i tawng  ngai dawn lo a ni. Thudik chu hei hi a ni, hringnun hian tawnhriat neih belh zel chungin nitin a  than len mamawh a, chu bak thlenna tur bi tuk sa dang a nei chuang lo" a ti a.

"Nun kan neihna chhan hi nitin a tawnhriat nei tura duan kan nih vang a ni a, chu kan thil tawn apiang chu hmang tangkai a, phur tak leh huaisen taka hmachhawnin, tawng belh leh zel tur a inbuatsaih hi mitin mamawh chu a ni."

Thian duhtak, i thil tawn apiang kha, i tan a tangkai tur leh, awmze nei a ni zel tih hrethiam thin ang che aw!

A video en duh tan:

Tuesday, June 30, 2020

Mizo thawnthu zirtir nei tha: Nun laklawh a tang

(Mizo motivational story)

Thailand rama khualzin pakhat chuan a vahvelnaah sai awmna hmun pakhat a va thleng hlawl mai a. Saite chu a va hmuh chuan a rilruah thil pakhat a rawn lang hlawl mai a. Chu chu hei a ni, chutiang ramsa lian em em mai te chu an ke pakhatah chuan hruizen te tak te hian an lo hling bet thei chu a ni. An ke phuar nan chuan thir khaidiat emaw ramsa khungna tur a siam bawm pawh an hmang si lo a.

Thil lang chiang ta deuh mai chu, saite chuan duh nise, an ke an phuarna atang chuan an duh hun hunah an tal chhuak thei tur a ni a. Mahse, chhan tha tak avang in an tal chhuak lo a ni.

Khualzin chuan a bul hnaia sai enkawltu lo awm chu ava bia a, engvang a chung saite chu tlanchhuah pawh tum lo leh thuawih taka an awm theih na chhan chu a zawt a.

Sai enkawltu chuan, "Aa..englo ania, heng saite hi an la naupan lai leh an taksa pawh a la tet lai khan, heng hruizen a len dan pawh ngai reng hian kan hling thin a, chutiang ang tiat an la nih lai chuan an mahni hlin behna atan a tawk em em thin a ni. Chutichuan, an rawn thang lian zel a, an rilruah heng hruizen te hi an ti chat thei lo tih hrethiam thei turin kan thunun tlat thin a ni. Lian tawh hle mahse, hruizen hian a la thlung bet tlat thei tih an ring nghet hmiah tawh mai a. Chuvangin, talchhuah an tum ngai lo reng reng" a ti a.

Khualzin chuan mak a ti em em a. Heng saite hian tum tak tak se an duh hun hunah an talchhuah nghal thei tur a ni reng si a. Nimahsela, an mahni hlingtu hruizen atang chuan an tal chhuak thei lo tih an in ringnghet tlat tawh a, an tan tlanchhuah ngaihna a awm lo a ni.

Hringnunah hian heng saite ang mai a nun hmang mek hi engzat tak awm ang maw? Kan rilruah hian engemaw ti ve thei lo tlat inngaihna kan nei thin. A chhan ho tak chu, a tih a kan tih hma hauh a kan beidawn nghal thin vang a ni. 

Chuvangin thian duhtak, i hun kal tawh a bahhlahna leh phurrit i lo tawh te avangin hmalam pan a i kalna tur chu dal tirin awm suh se. Hun kal tawhah i lo hlawhchhamna chuan i hmalam hun kawng chu, a ti bahhlah tur a ni lo. Nangmah ngei mai kha phur tak leh a tha zawnga  rilru pu chungin, hmalam panin ke pen rawh le. 

Ti hian in fuih la, engpawhnise ka bei ve hrim hrim dawn a ni ti la, i thil beihah chuan rilru zawng zawng in ti la, zau takin meng la, tawp chin a awm tur a ni lo tiin thawk ang che. 

Chu i beihna kawngah chuan nangmah ngei pawh a tha lo zawng a rilru pu lo turin in khuahkhirh tlat ang che. Zalen takin awm la, thil thar beih tum la, mithar kawm la, he kan khawvel ram zau tak hi han thlir kual chhin teh, theihna a awm a ni tih hmuchhuak ang che.

A video ngaithla duh tan: