PAWL 10 LEH PAWL 12 RESULT NEI THAR TE TAN
Tunhnaiah Pawl 10 leh Pawl 12 result a lo chhuak ta a, zirlai leh nu leh pa ten ngaihtuahna kan sen theih nan, a hnuaia kan tarlan te hi ngun takin i ngaihtuah tlang ila:
1. A hmasaberah chuan zirlai kan nih chuan kan lehkhazir chu nakin huna kan hmalam hun atana tangkai tur leh eizawnna kawng kan zawhna tura min puitu tur anih avangin tih tak zet leh taima taka zir tur a ni.
2. Zirna hi miin tih tak zet leh rilru nei taka an zir loh chuan hlawhtlinpui a harsa thin a ni.
3. Eizawnna hrang hrang a awm a, sawrkar hna te, sumdawnna leh company lama hna te a ni tlangpui a, chung ang hna awmah chuan eng kawng nge kan zawh ve ang tih lo ngaihtuah lawk thiam te tan eizawnna kawng zawh a awlsam thin a ni.
4. Mizorama kan lehkha zir dan tlangpuiah chuan a hmaa lo ngaihtuah lawk lem lo leh admission tih hun a lo inhawng a, thiante tih/thenawm fate tih ang ang zir ve ngawt te kan tam thin a, heng avang hian kan nih tur min nih tir lo fo thin a ni.
Pawl 10 pass thar te tan:
1. Pawl 10 kan pass chiah hian kan subject lak tur uluk takin kan ngaihtuah tur a ni, subject hlawm lian deuh Arts, Science & Commerce zir tur kan nia, heng hoah hian kan tuina ber leh kan thiamna ber thlan thin tur a ni.
2. Arts subject kan lak chuan a tlangpui thuin pawl 12 zawh hnuah college-ah B.A a zir theih a, chumi zawhah University-ah M.A leh a chunglam research course (Ph.D etc) thleng a zir theih a ni.
3. Science subject kan lak chuan pawl 12 zawh hnuah College pangngaia B.Sc zir chhunzawm a theih a, University-ah M.Sc leh a chunglam research course (Ph.D etc) thleng a zir theih. Tin, hemi bakah hian technical course hrang hrang entirnan; Engineering (B.E/B.Tech) te, Medical (MBBS/Nursing/Pharmacy) te a zir theih bawk a ni.
4. Commerce subject kan la anih chuan sumdawnna lam hawi zirna a ni a, pawl 12 zawh hnuah college-ah B.Com leh University-ah M.Com leh a chunglam research course (Ph.D etc) thleng a zir theih. Chubakah, commerce zirlaite tan chuan Management lam zirna BBA leh MBA te pawh zir a awlsam bik thin a ni.
Pawl 12 pass thar te tan:
1. A chunga kan sawi lan tawh ang khian kan subject lak a zirin pawl 12 zawh tawh hnuah chuan kan zir leh zel tur kha chi hrang hrang a ni tawh dawn a, college a lehkhazir tur kan nih tawn dawn avangin kan zirtur pawh uluk taka thlan thin tur a ni. College a zir chhunzawm tum tan chuan eng subject nge kan tui a, chumi zirchhuak ni chuan eizawnna kawng ka zawh thei angem tih ngaihtuah tel tur a ni. College zirlai hi a pawimawh em em a, graduate course zir zawh rualin mahni kea ding thei tawh tur a ngaih kan nih avangin mahni zirlai kha hna/eizawnna tlak a thiam bel tur a ni.
2. Arts subject la tan chuan B.A course hrang hrang a zir theih a, Science subject la tan college pangngaiah B.Sc cource hrang hrang bakah technical course hrang hrang a chunga kan sawi tawh te zir theih a ni. Chutiang bawkin Commerce subject zir tan pawh college a B.Com course zir emaw management lam zir te pawh a theih a ni.
3. Pawl 12 kan pass hian a tlangpuiin kum 3 chhung chu college-ah degree course zir leh tur kan nih avangin kan inngaihtuah nasat a tul hle a ni. Mizoramah hian college zir zo tawh te hian kan zirchhuah thiamna hi eizawn nan kan hmang tangkai vek lo a, hei hi a chhan bulpui ber pakhat chu ngaihtuahna seng lem lo a, college kan kal ve mawp mawp vang te leh kan thiante zir ang tui em em chuang lova kan zir ve ngawt vang te pawh a ni thei ang.
4. College course te hi hun pum a zir chi a ni a, class zawh hunah pawh library an hawn chhung chu lehkha chhiar tum tur. Zirlai ngai thutak lem lova in lak thawven ringawt ngaihtuah ṭhin te tan zirlai a thiam bel theih tak tak loh. Mizoram college zirlai tam zawk hi library hmang tangkai lo anni a, an hlawhtling lo chawk bawk ṭhin.
5. College kan kal chhan ber chu zirlai thiam a, hriatna leh thiamna neih belh a ni. Chung hre lova a kahpaha zir ve mai mai leh thian inkawm nana hmang ta mai mai an tam thin avangin, Mizoram college atanga graduate thar te zingah State leh National level inelnaa lang pha kan nei tam lo ṭhin hle. Zirlai hlawhtling taka zir tur chuan mobile games/social media hman thiam viau ai chuan zirlaibu te taima taka chiar a, thiam bel em em tur a ni a, chutiang ti thin mi tlemte te chu an hlawhtling zawk thin.
6. College course thiam bel taka zir zo te tan MPSC/UPSC in competitive exam (MCS/IAS etc.) a buatsaih te hmachhawn a zuamawm thin. Hei hi sawi zau hlek ila, Civil service exam course ho hi graduation course mila siam a ni a, chuvangin college kal laia mahni zirlai thiam bel em em te tan, a hranpa a coaching kal leh kher ngai tawh chuang lovin civil services exam turin inbuatsaih a theih nghal thin a ni.
7. Lehkha zir peih lo chi nih chuan college kal buai kher loin mahni tuina zawng eizawnna kawng zawh mai hi puitlin hmana a ni. Zir peih chuang si lova college a kum 3 chuang va inhamtan ai chuan mahni tuina lama kal mai khan hun leh pawisa kan paih lo zawk. Mizoramah pawh eizawnna atana tangkai tur zirna ITI, Nursing School leh Polytechnic Institute etc te kan nei a, chungah te chuan kan tuina mila eizawnna tur course zir mai a pawi miah lo a ni.
8. Nu leh pa te tan pawh kan fate hlawhtling se kan duh chuan, an hmalam hun atana tangkai tur zirlaibu leh tul kan ngaihtuah sak bakah, an rilru lamah pawh hlawhtling tura fuiphur reng te hi kan mawhphurhna a ni. TV a mahni tan zawng club te inkhelh hun te, hmuhnawm kan tih zawng seriel chhuah hun tur hre thei viau si, mahni fate test/exam hun hre leh si lo nu leh pa a awm theih. Tunlaiah Youtube te kan ngaithla nasa tawh a, nu leh pa ten kan fate hi mi hlawhtlingte chanchin ngaihthlak pui thin ila, chu chuan an rilruah a tha zawngin kawng tam takah a pui thin ang.
9. Chhungkua leh mimal dinhmun te a inang lo thei a, nu leh pa thenkhat tana mahni fate zirna zawh zel dan tur ngaihtuah a harsat lem loh laiin, thenkhat tan chuan ngaihtuahna sen ngaihna hriat loh pawh a awm thei thin. A ngaihna kan hre vak loh anih chuan, mahni veng chhung leh kohhranah te chutiang lama biak rawn tlak te berawna, an thurawn lak thinte hi kan fate hlawhtlin nan a pawimawh a ni tih i hrechhuak fo ang u.
10. A tawpna berah chuan, zirna kawng kan zawh dawn anih chuan tum bul fuk tak neih a, chu kawng chu hlawhtlinpui tum em em chunga zawh ngar ngar angai tih hre thar leh ila, chutiang anga tumruhna nei kan nih lem loh chuan zirna kawng pangngai zawh aiin kan tuina zawng eizawnna kawng zawh hma hi kan tan a tha zawk tih hriattur a ni
- Dr. Lalzarzoa
No comments:
Post a Comment