Monday, December 12, 2016

Krismas pual thawnthu: Dollar 25 hloh huam in

Krismas thlen nan chawlhkar khat chiah a awm tawh a, Ian-a chu  a hnathawhna hmun atangin tlai tak a chau hnepin a haw a, an in kawngka ah chuan a fapa kum 5 mi chuan phur takin a lo hmuak a.

A fapa Jack-a chuan "Apa, zawhna ka zawt thei che angem?" a lo ti a. Ian-a chuan "Aw, min zawt rawh" a ti a.

"Apa, darkar khat chhung in pawisa engzat nge i hlawh?"

Ian-a chu a chau deuh bawk nen "I lo buaina tur a awm lo a, chutiang zawhna te tinge min zawh ni" tiin a fapa chu a vin ta hrep mai a.

Jack-a chuan a pa in awka vin thak a chutiang a chhang chu hlau hmel deuh a melh pahin inthlahrung deuh hian "Apa, khawngaih takin darkar khat chhung a i hlawh chu min hrilh hram rawh ka hre duh emai" a ti sap a.

Apa chuan faten chutia hre duh ta na na chu tiin aw dam deuh zawkin "Jack, i hre duh tak tak a nih chuan maw, darkar khat chhungin dollar 25 ka hlawh thin" tiin a chhang ta a.

Jack-a chuan inthlahrung takin "Chuti a nih chuan i pawisa dollar 10 min puk tir phal angem?" tiin a pa chu a zawt a.

Ian-a hnawthawk chau bawk si chuan a fapa zawhna a thin in a tuar ta lo a, "I thil mi zawh hi Krismas pual a toy leina tur emaw thil tul hleilo leina tur dang engemaw i duh vang mai mai a ni, i pindanah kal nghal la va mu rawh. I hma i sial zia te hi va ngaihtuah la, naupang hmasial tak tan nitin hna ka thawk hah lo tih hria ang che" a ti ta phiar phiar mai a.

Jack-a pawh chu a pa thuawih in a pindan ah chuan a phei ta nghal a.

Ian-a chu thuthleng ah a thu hahchawl a, a fapa Jack-a zawhna chuan a thin a la tirim tun a, pawisa duh vang mai mai khatiang zawhna kha engtia min zawt ngam nge maw  anih reng reng  ni a ti a.

Darkar khat a liam hnu chuan Ian-a pawh a hahdam ta deuh a, fapa zawhna kha enge a lei duh pawh a lo zawt ta lem lo a, fapa in pawisa a dil khat teh reng nen mamawh riau te a nei aniang tiin a fapa chu va zawh chian tum a pindan ah chuan ava pan a.

Ian-a chuan "Ka fapa i muhil tawh em?" a va ti a. Jack-a chuan "Aih apa, ka la meng" a lo ti var a.

Ian-a chuan "Nichin khan ka lo vin deuh a, nileng in hna ka thawk a ka chau ve a, ka thin in a tuar ta lo a nih kha, kha le i mamawh leinan chuan dollar 10 chu ka pe ang che" a ti a.

Jack-a chu a rawn tho nghal a, nui var var chungin "Apa, ka lawm e aw" a ti a. A lukham hnuai atang chuan pawisa dang a lo khawl te a rawn la chhuak a.

Ian-a chuan a fapa in pawisa a lo nei reng tih a hmuh chuan a thinur tha leh a. A fapa erawh chuan muang changin a pawisa lehkha kawl ho chu a chhiar niap niap a, a chhiar zawh chuan a pa lam chu a rawn hawi chhuak a. Engmah a sawi hma in a pa chuan "Pawisa nei reng chungin engatinge a dang i la duh?" tiin a hrawk leh ta a.

Jack-a chuan "Ka duh khawp ka la nei lo a, mahse tunah chuan ka nei ta e" tiin a pa chu dam diai in a chhang a. "Apa, tunah chuan dollar 25 ka nei ta a, i hnathawhna atana hun hlu tak i sen thin atangin khawngaih takin darkar khat lek ka lo lei then sak thei che angem? darkar khat ka lei chuan Krismas urlawk ni tlaiah i lo haw hma thei ang a, zanriah eipui che ka duh a."

Ian-a chu a fapa Jacka-a thilsawi chuan a ti lawm ta em em a, a fapa chu a va kuah a, "ka fapa, min ngaidam rawh  i rilru hre lo in ka lo hau che' a tiin ngaihdam a dil ta mawlh mawlh a.

He thawnthu atang hian hah leh rim tak a hnawthawk thin zawng zawng te in lo hriat atan thil sawi kan duh a. Min ngaisak a min thlahlel em em tu te tan a hun pawh hmang mumal ngailo in hlawh tam umin kan hna ah ringawt kan lo in hmang zo thin em? Hnathawhna atanga Dollar 25 hloh na tur pawh nise hmangaihtu te tan a chu hlohna chu a lo hlut si zia hi hrereng thin ang che.

(He Christmas thawnthu tawi hi saptawng "A Different Short Christmas Story. A Tale We Can All Learn From:' tih atanga ka lehlin a ni a, chhiar a nawm zawk theih nan a remchan dan angin ka siamrem - Lalzarzoa)

Krismas thawnthu: Pawisa lehkha Cheng nga bo

Chippenham George chu Fareham khaw dak in a thawk a ni a, a hna ber chu miin dak a lehkha an thawn a address diklo an ziak te lo chinfel a ni. Nikhat chu Krismas dawn hnaih te ah hian a dawhkan ah chuan lehkhathawn address dik lo chinfel tur hi a rawn thleng a, lehkha ip kawmah chuan "To.. Pathian" tih chiah hi inziak a awm a, George chuan angaihna hre lo tak chung lehkha ip chu chingfel turin a hawng ta a.

Lehkha ip chhungah chuan lehthawn hetiang hian a lo inziak a:

Pathian Duhtak,

Hmeithai kum 93 mi ka ni a, sorkar pension min pek ring a nung ve hram hram ka ni a. Nimin khan miin ka pawisa dahna ipte min ruk sak daih mai a, a chhungah chuan ka pawisa neih zawng zawng  Pound 100 a awm a, Krismas hma in pension pawisa dawn tur ka nei tawh rih bawk silo. Karleh mai hi Krismas a ni tawh a, ka thian 2 te Krismas pual a chaw rawn ei turin ka lo sawm ve tawh bawk si a, ka pawisa neih chhun a bo ta vek si a chaw ei tur leina tur pawh ka nei ta lo a ni. Chhungte han dil mai tur ka nei lo a, nangmah chauh hi beiseina ka neih chhun chu i ni mai. Pathian, khawngaih takin min pui tanpui thei angem?


Chu lehkha a chhiar zo chu Chippenham George thinlung a khawih ta em em a, an office notice board ah chuan midangte lo chhiar ve theih turin a va tar ta hial a. Dak in a thawk te chuan an lo chhiar ve a, an rilru a khawih ta hlawm em em a, an pawisa neih atang chuan an phal ang ang chu chu hmeithai tan tiin an rawn thawh khawm a. An pawisa thawhkhawm chu Pound 95 lai a thling ta mai a. An thawhna dak in official envelope (lehkhaip) hmang in chu hmeithai pawisa tibo hnenah chuan an thawn ta ringawt mai a ni. An thawnni chuan dak in a thawk te chuan an thil tih chu thil liam tham nilo mahse an rilru chhungril ah lawmna tak an nei hlawm a.

Krismas pawh chu a lo zo ve leh ta a, nikhat chu "To... Pathian" tih ringawt inziak lehkha ip dang chu dak in ah a rawn thleng leh ta hlawl a. Dak in a thawk te chuan enge a chhungah awm tih hre chak in an rawn tlankhawm a, Chippenham George chuan engthil dang tak inziak leh ang maw tiin lehkha ip chu phur ru takin a han hawng a, ti hian lehkhathawn ah chuan a lo in ziak a:

Pathian Duhtak,

Ka chung a i thil tih ropui tak avang hian hei lo liam a lawmna reng ka nei thei lo e. I thilphalna avangin Krismas niah khan ka thian te 2 chu chaw ei turin ka sawm theih phah ta a ni. Hun hlimawm tak kan hmang ho a, ka thiante hnenah pawh i thilpek ropui tak hi ka hrilh nghe nghe a ni. Kan lawm zia chu kan sawi seng lo zawk a, kan kohhran puithiam Father John pawh hemi vanga  hlim ber zing a mi a ni e. Thudang alai chuan, i pawisa min rawn thawn ah khan  Pound 5 a bo hlauh mai a, a chhan pawh ka dawn kha Pound 100 nilo in Pound 95 chauh a ni a, ka rin dan chuan post office a thawk ten Pound 5 chu an lo ru then a nih ka ring.


George chuan chu lehkhatawn a chhiar zawh chuan ziaktu lar Oscar Wilde a sawi "Thil tha tih pawh hian hremna tawh a bang chuang lo e" tih chu a hrechhuak hial nghe nghe a ni.

(He Christmas thawnthu hi saptawng a "The Missing Five Pound Note'" tih atanga ka lehlin a nia , chhiar a nuawm zawk nan a remchang dan anga ka hriat in a thawnthu hi ka her rem nual a ni - Lalzarzoa)

Krismas pual thawnthu: Lak aiin pek in lukhawng a nei zawk

Corinnie chu hmeichhe naupang niin khawvel ah hian baihvai takin a hun a hmang a. A nu leh pa in an boral san tawh a, chenna tur in mumal pawh a nei lo a. A thawhnaw inbel laibak chu ka ta ti a sawitur neih a nei lo a ni. Eitur pawh a nei mang lo a, miin chhangthawp tlem an pek bak chu eitur neihsa pawh a nei lo a ni.

Corinnie chu khawvel ah vanduai hle mahse Pathian in ala tanpui dawn a ni tih a beisei tlat thung a. Nikhat chu Krismas te a hnai tawh nen khawpui lam a nun khawchhuahna tur zawng turin an khua a chhuahsan ta a, an khua atanga hla lo teah chuan kawngsir a putar lo thu a va hmu a. Chu putar chuan "Ka fanu, ka ril a tam tawh lutuk a eitur min pe rawh" tiin a lo ngen ringawt a. Corinnie chuan ui hauh lo in a chhangthawp ei tur neih chhun a pe ta mai a.

Tichuan khawpui lam pan chuan a kal zel a, an khaw biak in chhip zum pawh a lang thei ta lo. Kawngah chuan mipa naupang kutdawh a va hmu a. Chu kutdawh naupang chuan " Ka lu khuhna nu engemaw min pe thei angem, vawt ka ti lutuk" tiin a lo bia a. Corinnie chuan a khawngaih em avangin a lu khuhna chu ui hauh lo in chu kutdawh chu a pe leh ta a ni.

A kalthui zel a ramhnuai sir deuh ah hian hmeichhe naupang pakhat a tawk leh a. Chu hmeichhe naupang chuan "Thian duhtak, pawnfen ka nei lo a vawt ka ti em a pawnfen min pek tur i nei mial lo maw? a lo ti a. Corinnie pawh chuan a hak lai kawr leh pawnfen bak neih neilo mahse a pawnfen chu hlip chu hmeichhe naupang vawt ti em em chu a pe ta a.

Tlai a lo ni a, a kalna rawmhnuai kawng pawh chu thim chho tan dawn ta mai a, naupang dang a tawk leh a, chu naupang chuan  vawt a tih em avangin Corinnie chu kawr a lo dil leh a. Kawr hak lai bak neih a neih tawh lo avangin Corinnie chu a in ngaihtuah buai ve ta khawp mai a. Mahse ngun taka  angaihtuah hnuah chuan ramhnuai a paltlang a kal mek a ni a, khua a thim chho dawn a kawr ha lo pawhin kal mah ila tuman min hmu dawn chuang lo ti a rilru siamin a kawr neihchhun a haklai chu naupang khawvawt ti a khur hlak hlak chu a pe leh ta  ani.

Corinnie chu thawmhnaw hak tur pawh nei lo in khawvawt hnuaiah chuan a hmalam panin a kal ta zel a, khua a vawt si a thawmhnaw hak tur  anei tawh bawk silo a khur nasa tan chu a ni ta mai a, mak deuh maiin van atangin arsi rawn tla niawm tak thil rawn phe zuai hi a hmu hlawl a. Chu thil rawn tla chu a han bel chiang a thil sakhat niawm tak infun leh thil tle neuh neuh niin a hmu a. A va kal hnaih chuan thil sakhat ni a hmuh chu thawmhnu fun a lo ni a, thil tle neuh neuh pawh chu pawisa nawi a lo a ni a. Thawmhnaw fun chu a han hawng a, a hma a thawmhnaw aia tha daih leh mawi zawk daih a lo a ni a. A kut pahnih chuan a han lek vel a a mak ti lutuk chuan a thlek ta ngawi ngawih a, pawisa nawi pawh chu a theih ang a tam a chhar khawm ta a. A eitur neih chhun leh thawmhnaw neih chhun chu midang te tan pe vek mahse mak tak maiin a a mamawh pek in a rawn awm ta a ni. A thawmhnaw chhar chu a ha ta sawk sawk a thlasik khawvawt tak karah chuan a taksa pawh a lo lum ve chho leh ta a. Tichuan, a pawisa nawi chhar te nen chuan a hma lam a khawpui lo lang eng uar chu phur takin a pan ta a ni.

Kal kawng a pawisa chhar chu a lo thahnem fe mai a, khawpuiah chuan thlenna tur a neih theih bak ah a inenkawln tur tuakna tur a zawn theih phah ta zel a, a nun lo kal leh zelah pawh lungngai lo takin a awm ta zel a ni.

Engkim ka tih apiangah ka tihhmuh thin che u kha, chutianga thawk rim chung leh, Lalpa Isua thu hre reng chungin mi chak lote in tanpui tur a ni; amah ngeiin, 'Englo lak aiin pekin lukhawng a nei zawk,' a tih kha," a ti a. (Tirhkohte 20:35) 

( He  Christmas pual naupang thawnthu hi sap tawng a  "An Inspiring Parable At Christmas: It Is More Blessed To Give Than To Receive" tih a atang a ka lehlin a ni a, a chhiar a nawm zawk nan a remchang dan angin tlem tleim ka siam rem a ni - Lalzarzoa)

Saturday, March 5, 2016

Sermon Thawnthu: TUIFINRIAT THLIPUI HRANG KARAH


Pathianni zan a ni a, dan pangngai angin mipui ten hla an sak ho zawh ah muang changin Pastor chu a rawn ding chhuak a, pulpit ah a lawn chho a, thuchah a sawi hma in mikhual rawn inkhawm ve mi pakhat chu in hmelhriattirna a nei a. Pastor chuan mikhual pa chu a naupanlai thiantha tak pa a nih thu leh kohhran mipui te hma a chibai bukna leh kohhran mipui te tan a tangkai tur a duh apiang sawina hun a siam sak a.

Mikhualpa chuan hetiang hian a thusawi bul a rawn tan a, "Pafa leh a fapa thianpa te chu Pacific tuipui kam atangin lawng in an zin chhuak a.." "Thlipui na tak a rawn thawh avangin vaukam lama kir leh tum an in kar let pawhin a harsa ta tlat mai. Tuifawn a rawn sang tial tial a, pa ber chu lawngpui tawnhriat ngah tak pawh nimahse tih theih a nei chuang lo, tuifawn in lawng chu a rawn chim nasa telh telh a, pa ber chuan a lawng khalh chu a veng seng ta lo, tuifawn nasa takin a rawn vawrh vak avangin lawng chu a pil dawn dawn ta mai a ni."

Lawng chu tuifawn in a vawrh nasat tak em avangin tuifinriat ah chuan a pil thuai dawn ta si a, lawng khalhtu pa ber chuan thuthlukna harsa tak a siam a ngai ta. Tanpuitu an awm hnaih takin tiin 'tanpuina thir hrui' pawh a thawn chhuak ta nghal a. Mahse tanpuitu hmel reng reng hmuh tur an rawn awm silo. Pa ber chuan inchhanhimna kawr 1 chiah a lo pai si, chu chu a fapa leh a thianpa hnenah pek angai dawn ta a. A fapa zawk chu Kristian a ni a, a fapa thianpa zawk chu Kristian a ni lo thung a ni.

Tuifawn a sang zel a, lawng pawh chu a vawrh nasa tawh lutuk a, chhanchhuahna kawr chu pa ber chuan a pek a ngai ta. "Ka fapa ka hmangaih che" tiin a fapa chu a au vak a, mahse, chhanchhuahna kawr zawk chu a fapa thianpa hnenah chuan a hlan ta zawk a ni. Chu zanthiam thlipui leh ruahsur nasa tak karah chuan pa ber lawngpu chuan a fapa zawk chu chhanchhuahna kawr a hak ve loh avanga tuifawn in lawng a vawrh avanga tuifinriat chhung a tla lut lai chu fiah lo ruaiin ava hmu a, mahse chhhanchhuahna kawr zawk kha  a fapa thianpa a pek si avangin chu chu afapa chan tur zawk chu a ni tih chiang takin a hre lawk sa a ni.

Lawngpu paber nibawk chuan a fapa chu tuifawn in la bo in tuifinriat ah tla hlum mahse a thlarau chu Lal Isua hnenah a thleng dawn tih a chiang hle a, mahse, a fapa thianpa chu Kristian anih ve siloh avangin a thlarau chuan Lal Isua hnen athleng dawn lo tih a hre bawk a. Chuvang chuan a fapa thianpa nunna chhanhim nan chhanchhuahna kawr chu a fapa hnenah pe ta lo in a thianpa zawk chu a pe ta a ni.

Mikhualpa chu a ngawi det a, tihian a sawi chhunzawm a, "Pathian hmangaihna ropui tak chuan chutiang a lawngpu in a fapa thianpa chhanchim nan a a fapa nunna tawp chu a pawiti ta lo ang khan hmangaihna mak tak chu a rawn thlen tir a ni. Kan thlarau chu boralna kal mai tur a nih avangin Pathian chuan a fapa neih chu kan nunna atan krosah a rawn thih tir ta a ni. Chumi avang chuan chhanhim kan ni a, chatuan nunna pek kan ni bawk." tiin. A thusawi zawhah chuan Pastor chuan sermon tawite a sawi chhunzawm leh an bang ta a.

Inkhawm banah chuan mipa rawlthar 2 hian mikhualpa chu rawn bia in, "I thusawi kha a ngaihnawm khawp mai, mahse, a tak tak a ni thei lo ang a chhanchu pa ber in a fapa thianpa chu Kristian anih theih beiseina nen a fapa zawk chu chhanchhuahna kawr pe lo in a thih tir thei a nia" an rawn ti a. Mikhualpa chuan "In ti tha e, ka thusawi kha in lo chik khawp mai" tiin a Bible hlui tawh tak a ken chu dahthat pahin rawlthar 2 te lam chu a hawi leh a. "Ka thusawi kha a tak tak a nih a rinawm loh mai thei a ni, mahse, Pathian hmangaihna thukzia leh a hmangaihna avanga a fapa neih chhun pawh midang ten nunna an neih theihna tur a pek zia te sawi fiah turin zaninah hian Pathian chuan chu entirna chu a tak takin min lo paltlang tir ve tawh asin" a ti a. A thusawi chu an ngawi leh det a, "In awihlo a in demawm lem loh e, mahse maw, in pastor lo ni ta hi ka fapa thianpa chu ania, keimah hi khami zana lawng khalhtu pa ber chu ka ni e. Chutiang chung pawh chuan Pathian hmangaihna thuk zia hi ka hriat ve chhun chu tlem tak a la ni zawk asin" a ti a.

"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan." (Johana 3:16)

(He thu hi saptawng a ziak a nia, Mizo tawng a chhiar tur awm ve atan ka awt em a thiam ang tawkin ka letling ve a, chhiar a nawm zawk theih nan a tawngkam thenkhat pawh kan tawng mil deuhin ka siam rem ve tawp a ni. Internet lam a Mizo tawng sermon thawnthu chhiar tur zawng thin te tan a tangkai ngei ka beisei- Lalzarzoa)

Monday, June 8, 2015

MIZO BIBLE STUDY - 1 THESSALONIKA BUNG 2 LEH BUNG 3



1 Thessalonika Bung 2:1-20 leh Bung 3:1-9.
 
Buatsaihtu: Lalzarzoa, University of Hyderabad

Chang vawn:  “A ram leh a ropuina chang ve tura ko tu che u Pathian mi ni tlaka awm turin kan ngenin kan fuihin kan hriattir thin che u a nih kha”. 1 Thesalonika 2:12.
A BUNG THEN :-    1. Bung 2:1-16:  Thessalonika-a Paula rawngbawlna.
                                2. Bung 2:17-20:  Paulan Thessalonika tlawh leh a chak.
                                3. Bung 3:1-9:  Paulan Timothea Thessalonika ah a tir.

THUHMAHRUAI: Thla hmasa khan tuna kan Bible study neih mek Thessalonika lehkhathawn sawi hawnna leh thawnkhatna bung khat-na chungchang kha kan zir tawh a nih kha, amaherawhchu thla te a vei leh tawh a, kan za vai a hriah leh atan Thessalonika lehkhathawn chanchin leh a hunlai boruak leh a khaw chanchin te tlem te tarlang leh ila a tha awm e.

Thessalonika lehkhathawn hi kan hriat theuh angin Tirhkoh Paula ziah niin a rawngbawlpui Sila leh Timothea te pawh a ziaktu zingah hian an hming a lang tel. Bible a Thuthlung thar  Chanchintha bu te ziah hunlai vel a he lehkhathawn hi hi ziah niin chhuitu thenkhat chuan an ring a, a ziah hunlai hi rindan hrang hrang awm mahse a tlangpui thu in Isua kraws a khenbeh a nih hnu kum 20 lam 43-52 AD inkar vel a ziak anih an ring tlangpui. A thawnna na hmun hi Korinth khua ni a sawi a ni. Thessalonika khua hi Rom lalram pakhat Makedonia ram khawpuiber a ni a, a khua hi Mediterranean tuipui kam lawnchawlhhmun a awm a ni. Ziaktu thenkhat chuan hetih lai hian Thessalonika khawpui ah hian mihring Nuai khat chuang an cheng tawh niin an sawi. Kan hriat tel ve atan a tha chu Thessalonika khua hi tunlai ah chuan Greece ramchhung ah awm in an ram khawpui lianber dawttu a ni a Salonica tia hriat a ni tawh a ni. A khua hi sumdawnna hmunpui a ni a Rom lalram kawngpui pawimawh chhhim leh hmar, chhak leh thlang intawhkhawmna hmunpui anih avangin sumdawnna a thangduang hle a ni. A khua a cheng te hi Rom khua leh tui te anni a, Bible a kan hmuh ang hian Juda leh Jentail te bakah a hunlai a khawvel hnam hrang hrang te an inchenpawlh nasa hle a Grik mi te, Rom mi (Italy ho)  a tam zawk sipai bang te pawh an cheng a ni. Milem bia (Pagan religion) anni thin a, Tirhkoh Paula te rawngbawlna avang hian ringtu (Kristian) ah an lo inlet ta a ni.

Kan hriat theuh angin Tirhkoh Paula rawngbawl a zinchhuah vawi 2 na (Paula zin vawi-2 tia Bible a map nen a awm) ah hian Sila leh Timothea ten an zui a, Asia ramah rawngbawl an tum a, mahse Thlarau Thianghlim in a khap avangin rawng an bawl thei ta lo a (Tirh 16:6-10), Troas khua ah an awm laiin Paula mumang angin Makedonia rama mi mi pakhat dingin “Makedonia ramah lo kai la min pui rawh” tia ngen chiamin a hmu a (Tirh 16.9) chumi hnu chuan Makedonia ram lam an pan ta a ni. Thessalonika khua an kal hma hian Philipi khua an te lung in an tang zak zak a, Amphipoli leh Apollonia khua an kal pel hnuah Thessalonika khua hi an thleng ta a ni. Tirhkohte 17: 1-9 ah khan he an rawngbawl dan hi a inziak a chawlhni vawi thum chhung in Juda te inkhawmna in ah Puala chuan Pathian Lehkha Thu atangin chanchintha a hril thin a ni. “Krista chu hreawm tuar tur reng a nihzia te, mitthi zing ata pawh tho leh tur reng a nih zia te chu a hrilhfiah a, a tilang thin a; “He Isua, a thu ka hrilh che u hi, amah hi Krista chu a ni,” a ti bawk thin a.” (Tirh 17:3). Chu a rawngbawlna avang chuan Juda zinga thenkhat chuan Pathian an lo ring ta a, an zingah chuan Grik mipui tam tak leh hmeichhe puipa tam tak te pawh an tel a ni. Hetiang anih mek lai hian Juda mi thenkhat ten an huphurh a dawrhmun a misual thatchhia te kokhawm in buaina an siam a, Paula te chu Thessalonika khaw hotute hnenah buaina chawkchhuak tu tiin an hruai ta a ni. Thessalonika atang hian ringtu te chuan Beroia khuah an kaltir ta nghal a ni.

AN RAWNGBAWL TAN DAN LEH CHANCHINTHA AN HRIL CHU A SAWIFIAH
Tirhkoh Paula hian a lehkhathawn pakhatna bung 2-na tir ah hian Thessalonika khaw mite hnenah hian an khua rawng a va bawl chu a thlawn lo a ni tih an hriatpui zia uar takin a sawi a, an khua an kal hma a Philipi khua a hreawm an tuar thu leh zahthlak tak a siam a awm thu leh chuti chung pawh a hnual mai lo a Pathian Chanchin Tha hrilh tur a huai tak a an awm tak zawk thu a sawi a ni. Philipi khua a harsatna an tawh hian mihring te ngaidan ang lo takin a lehlam zawngin an thinlungah Pathian atanga chhuak huaisenna an neih phah ta daih zawk a ni.

Puala hian Tirhkohte 17 ah kan hmuh angin Thessalonika khua a rawng an bawl lai khan Juda mithenkhat ten an hekna leh dawt a an puhna te sawifiah na leh chhanna te  Bung 2:3-5 ah hian kan hmu a chu chu “Kan thu hril hi dawta chhuak a ni si lo va, bawlhhlawha chhuak a ni hek lo va; Chanchin Tha kawltira awm turin Pathian tha tih mi kan nih ang ngeiin, mihring tilawm tur ang ni lovin; kan thinlung fiahtu Pathian tilawm zawkin thu kan sawi zawk thin a ni. Englai mahin fak derna thu emaw, duham khuhna emaw kan hman an hre ngai si lo tih in hriat kha (Pathian min hriatpuitu a ni). Paula an a sawilan ah chhinchhiah tlak leh kan hriatreng tur chu a insawifiahna ah hian mihring mai a ti a nih loh zia lantir nan “Pathian min hriatpuitu a ni” a ti tel hian a rawngbawlna ah hian a tirtu Pathian lakah a chian tawk zia a lantir a ni.

TIRHKOH DIKTAK LEH MI INNGAITLAWM A NI: Vawiin a Thessalonika lehkhathawn kan zirho a kan zirchhuah atana tha em em mai chu Paulan intodelh leh inngaitlawm tak chung a rawng a bawl hi a ni. Bung 2:6-11 kan en chuan hemi chungchang hi kan hmu thei a ni. Ziaktu thenkhat ten an sawi chu Puala hi a rawngbawlna hmun tam takah Juda mi thenkhat ten sawisel in Lal Isua zirtir Apostol (Tirhkoh) dik tak zing a mi a ni ve lo a, rawngbawltu suak tiin an lo sawihnawm thin a ni awm e. Chumi a chhanna ni angaih theih chu chang 6 ah kan hmu a “Krista tirhkoh ka nih avangin mi tan hautak zet ni thei mah ila, mihring lakah, nangni lakah pawh, mi dangte lakah pawh, chawimawina kan zawn an hre ngai hek lo.” Mi thenkhat ten tirhkoh ni lo tiin lo sawi mahse a ni erawh chuan Krista tirkoh a nih thu chiang takin a sawi a ni. Chu tirhkoh a nih na erawh chu duh nise la midang te lakah pawh inchhuang in hautak takin a khawsa thei ni hial in a sawi a ni. Mahse chutiang chu ti lo in Krista rilru pu chungin tu lakah mah chawimawina zawng lo in hautak lo takin “Nu nau pawm in a fate aduat angin an zingah nunnem takin an awm thu a sawi a, Pathian Chanchin Tha bakha an mah nun hial pawh an tan hlan an inhuam a ni.” A ni lah takah rawngbawlna ah hian indah san viau ai chuan nunnem leh inngaitlawm taka rawngbawl hian mite thinlung chhung ah hna a thawk nasa thin zawk reng a ni. Tunlai a nawmsakna leh nunphung awlsam zawk duh a phe phe rawngbawltu leh ringtu te hian hei hi kan zir nawn leh a tha khawp mai.

INTODELH CHUNGCHANG: Paula hian vawiin thleng a ringtu te leh a bik takin rawngbawltu ten kan entawn tur tha em em kan tih makmawh te pawh ti  ila kan sawisual awm lo e min zirtir a a nei chu chu intodelh chung a rawngbawl a ni. Chu chu bung 2:9-12 ah kan hmu a, chang 9-10 ah “Unaute u, kan thawh hahzia leh kan thawh rimzia kha in hre reng e; in zingah tumah kan tihhautak lohna tur che uin achhun azana thawkin, Pathian Chanchin Tha kan hrilh thin che u kha. Nangni ringtute chunga thianghlim tak leh fel tak leh demawm lo taka kan awmzia kha min hriatpuitute in ni, Pathian nen.” He Bible study nei tur atana ka inbuatsaihna a Thessalonika lehkhathawn a Paula tawngkam ka rilru thawk na deuh pakhat chu a thil sawi reng reng a a thil tih hriatpuitu chu Pathian a nih thu chiang taka a sawi tel thin hi a ni. Kan rawngbawlna ah te kan nitin nun ho naah te hian keini chuan a chang chuan Pathian hriatpui na tello hian kan ti thin a ni lawm ni? Kan tawngkam ah pawh “Ka sawisual leh Pathian in min lo ngaidam se” emaw “Pathian in min lo hrethiam se chumi kha mi kha chu aw.” te kan ti fo thin a ni.  Tirhkoh ni mahse midang te chawmhlawm a awm a duh lo a, a thlenna leh a va khawsakna ah pawh tumah a tihhautak loh nan rim takin hna a thawk zawk thin a ni. Paula te hian Thessalonika khuaah hian puan in te siam thain savun siam lam hna an thawk thin niin zirmi ten an sawi. Kan tunlai khawvel a rawngbawlna kan kalpui dan tam tak te ngaihtuah chuan Tirhkoh Paula te rawngbawlna hi hlawhtling lo chi zia zang a nilo a tih theih hial awm e. An rawngbawlnaah hian an awm mai mai lo a, midang te pawn an ngaihnep emaw sawisel theih loh tur in an khawsa a ni.

PATHIAN THU AN PAWM AVANGIN A LAWM: Paula hian Thessalonika a Pathian Chanchin Tha thu an va hril an lo rin tak avang in Pathian hnenah lawmthu a hril thu a sawi (2:13). Milem be thin Thessalonika khua a mi ten Pathian an lo rin tak avang leh Kristian ah an lo inleh tak avang hian Paula chu a thinlung takin a lawm em em a ni. Thessalonika khua a mi te Kristian a an inpek na hian a hma lama Judai ram a Pathian Kohhran pawl ho te anga Lal Isua Krista chu Lal leh Chhandamtu ah an pawm a, an rin avangin an mahni hnampui Lal Isua ring ve lo Juda te ngei te lak atang pawh in an tuar ve a ni. Thessalokina khua  ami te hnenah hian Juda ten Lal Isua leh zawlnei an tihhlum thu leh leh Tirhkohte pawh an hnawhchhuah thu te a hrilh a, chung chu ringtu annih avangin an tawn tur  ani a, mahse chung harsatna leh tihduhna thlen tu te chu Pathian in a lawm lo a, an chungah Pathian thinurna a thleng thin tih a hrilh tel bawk a ni.

THESSALONIKA TLAWH LEH A CHAK: Paula hian Thessalonika khua a ringtu te hi a ngaina in tlawh leh a chak hle ni tur a ni bung 2:17-18 ah hian tlawh  tum a beih nasat zia leh ama mimal pawn vawi 2 ngawt a tlawh a tum a mahse Setanan a dal thin thu a sawi a ni. A kohhran din Kristian lo nita Thessalonika mite chu Paula hian Lal Isua lo kal leh hunah pawh a chhuan tur te anni tih chiang takin a hrilh a ni. A thinlung in  avei hle bawk a, a beiseina leh a hlimna pawh Thessalonika khua a mi ten Pathian an lo rin tak avang a nih thu uar takin a chah a bawk a ni. 

THESSALONIKA AH TIMOTHE A TIRH A NI: Tirhkoh Paula hian Thessalonika a rawng a bawl lai khan Pathian ringtu chu hreawm tuar tur annih zia chiang takin a sawi a. Chung ringtu te tuarna chungchang leh anmahni a ngaihtuah avanga Timothea an hnena a tirhthu te chu bung 3:1-5 ah kan hmu a ni. Thessalonika a ringthar te chu an rinna kawnga tuar tur anni tiin lo hrilh tawh mahse ringthar mai anla nih avangin an tan a la rip hle tih a hria a, thlemtu in a thlem thlu hlau ang tih a hlauh em avangin Atheni khua atangin an mahni  tinghet tur leh rinna kawnga thlamuan turin a tir hial a ni. Timothe a tirhna chhan dang leh chu rinna ah chuan thlem thluk annih loh zia hriat a duh avang pawh a ni. (3:5)

Thessalonika atanga Timothea rawn let leh hnua chuan Paula chuan Thessalonika khua a ringthar tir te te chuan nghet takin Pathian rawng an lo bawl zel tih a hre thei ta, chumi avang chuan a manganna leh hreawmna a tawrh mek atang pawh in thlamuang takin a awm theih phah ta a ni. Rawngbawl tu tak tak te lawmman ber chu miten Chanchintha an lo hriat a, an lo ngheh zel a, midangte an hrilh leh chhawn a Krista hmangaihnaa an lo thanlen zel hi a ni fo thin. Lalpa a nghet tak a lo ding chhunzawm zel Thessalonika khua  ami te chu an hmel hmuh leh theih nan leh rinna lama an tlakchham te phuhruk leh thei turin Pathian hnenah Paula te hi an tawngtai thin a ni. Paula hian Thessalonika khua a mi te hi heti taka an hmangaih ang bawk hian anmahni ho thinlung chhungril ber thleng a in hmangaih ve turin a chah bawk a ni. Duhsak takin Lal Isua lo kal hunah pawh sawisel bo a an awm theih nan an rinna te chu dinngheh pui zel turin uar takinPaula hian a chah a ni.

(He Bible Study hi Hyderabad Mizo Christian Fellowship inkhawm Dt.7 June 2015 Pathianni a thiam ang tawk tawk a ka sawi ve a ni a,  Theology lam te kan zir ve loh avang leh he chanvo hi mi an tlem a lei a ka chungah a tlak ve tak ah chuan thulak nan hian internet lama Thessalonika chungchang Saptawng a an ziak te ka bih ve nual  a ni.)