US PRESIDENT THLAN DAN

- Ziaktu: Dr. Lalzarzoa, Department of History, Government J Buana College

Mizo te hian USA-in an ram president tur an thlan hi kan ngaihvenin kan lo tuipui ve viau thin a, an ram president thlan dan hi la hre ngai lo te kan awm takin,  hriatthiam theih awlsam turin i han chhui dawn ila.

Kum 4 danah an inthlang thin:

US president tur hi kum 4 dan zelah an thlang thin a ni. Kumin pawh hian naktuk November ni 5-ah an ram mipui ten thlang dawn a ni. Amaherawhchu, India rama kan tih dan ang lo takin president an thlan dan hi a kalkawng a thui deuh a, US a awm ve lo tan chuan hriatthiam mai pawh a har ve deuh thin a ni. He tian sawi ta ila a hriatthiam a awlsam ber mai thei e: Mipui ten an state aiawh tur an thlang phawt a, an thlan chhuah te chuan a hnuah mipui aiawhin vote an thlak leh thin a ni.

Inthlan hma kum 1-ah chet tan angai:

US-ah hian party lian pahnih Democrats leh Republicans te an inbei ber a, independent candidate te pawh an awm ve zauh thin. Inthlan hma kum 1-ah president candidate nih tum te chuan Federal Election Commission-ah predident post chuh an tum tih an inziak lut thin a ni. He tah hian campaign an nei tan tawh thin. State hrang hrang tlawhin nasa takin lam tang siam tumin an bei tawh thin a ni. TV-ah te debate an nei a, Mizoram atang te pawn kan lo ngaihven ve viau thin hi.

Party candidate tur primaries leh caucauseses hmangin an thlang thin:

US inthlanah hian ahmasaberah chuan party ten anmahni party chhunga president candidate nih tumte an thlang chhuak phawt thin. Chutah chuan inthlan dan chi 2 a awm a awm a, Primaries/Primary leh Caucasuses tiin an sawi thin. Hetah hian party aiawha president candidate nih tum ten theihtawp an chhuah thin.

Primaries emaw caucasuses inthlan hi state tinah party emaw tualchhung thuneitu ten, inthlanpui neih ni tura ruat hma thla 6-9 hmalamah an lo huaihawt thin. Heng inthlanah hian party ten national convention an neih huna an state aiawh tur palai thlanna neih thin a ni.

Primaries inthlanah hian secret ballot a inthlan neih thin a ni a, state tin tihdan a inang lo a, state thenkhatah chuan party member chauhin vote an thlak theih laiin state thenkhatah chuan party member ni kher lo pawn vote an thlak thei a ni.

Caucasuses erawh hi chu party in state chhunga khawpui lian deuh deuhah vantlang inkhawm an huaihawt a, candidate nih tum ten thu an insawi chhawk thin. Atawpah secret ballot hmangin emaw mipui pungkhawm te chu an tanzawng ber te tilang turin an inthendarh a, a pungkhawm tam ber te thlawp chu vote hmu hnem berah te pawh an ngai mai thin.

Primaries emaw caucasuses inthlanah hian state aiawh tur palai thlan thin anih avangin a pawimawh hle. Candidate zinga vote hmu tam apiang khan palai tur an ngah ta bik zel tihna a ni a, a tling zat atang hian president candidate tur pawh a lo rin lawk theih mai tawh thin a ni. State aiawh palai thlan chhuah tur zat hi mipui tam dan zela ruat thin a ni.

National convention-ah party aiawh candidate tur an puang thin:

State hrang hranga primaries emaw caucaus inthlana vote hmu sang ho te chu an han chhut chhuak ta a, chu ta palai nei tura vote hui tam ber chu a hriat theih ta thin a ni. State a primaries emaw caucasuses inthlana vote hmuh dan hi a chiri deuh chuan national convention-ah palai ten official candidate tur hi an ngaihtuah nawn a tul thin. Tichuan, party tin te chuan rampum huap intawhkhawm an huaihawt a, chu chu national convention an ti a, chutah chuan, state tin atanga palai tura thlanchhuah ngah ta ber chu, an party chuan, President atana official candidate turin an puang chiang ta thin a ni. Hetah hian president candidate atana thlan chhuah hian a vice president candidate tur a puang chhuak ve nghal thin a ni.

Inthlan campaign beihpui thlak dan:

Party ten palai thlanchhuah hmanga an official candidate te an tihfel tak hnu chuan ram pumah campaign beihpui thlakna an nei chhunzawm thin a ni. Hei hi a tlangpuiin September leh October thla chhunga neih thin a ni. An campaign boruak vel chu Zoram mipui te pawn ral atangin kan lo ngaihven ve em thin a ni.

Inthlanpui neih hi:

US ah hian mipui ten November Thawhlehni hmasaber-ah president thlanna an nei thin a ni. Hetah hian mipui te hian direct in president tur hi an thlang ngai lo va, an aiawha vote thlaktu tur te an thlang thin a ni. Chung an thlanchhuah te chu electoral college tiin an sawi thin.

Electoral college:

Mipui ten November Thawhlehni hmasabera vote an thlakah hianin an aiawh tura an thlan theih zat chu 538 a ni. State hrang hrang ten an aiawh (electoral college) tur an thlan theih zat hi a iang lo va, India rama MP kan inneih tam hleih ang deuh hi a ni. Vote tla te hi November thla chhungin chhiar thin a ni. Tichuan, President a tling tur chuan, electoral college atangin, a tlem berah vote 270 tal hmuh angai a ni. Mipui ten electoral college atana an thlan chhuah atang hian president tur chu rinlawk theih ruak tawh thin. Electoral College atana thlan chhuah te hian atlangpuiin December thlaah vote an thlak ve leh thin a ni. Tichuan a kum leh January thla tirah chuta vote tla te chu chhiar a ni a, president leh vice president atana thlan tlinte chu puan anni ta thin a ni. (India rama kan aiawh thlan chhuah MLA leh MP ten, President tur an thlang thin ang deuh te pawh hi a ang ve thei awm e.)

President lakluh: 

US president leh vice president atana thlan thar te chu January ni 20-ah rinawmna thutiam tira lakluh an ni thin a  ni.

(A chunga thuziak hi a hre tawh te tan chuan a kimchang lo viau ang a, he ta ka rawn ziah chhan tak erawh chu a la hre ngai lo emaw lo hrethiam lo ten awlsam zawka an hriatthiam theih nana ziak chauh ka ni e )

Pic courtesy: https://www.sketchbubble.com/en/presentation-us-elections.html