Thursday, January 29, 2015

HARSATNA (Mizo Sermon article)


[Ref: II Korinth.12:7-10, Rom.5:3-11; 8:35-39]

Fakhla siamtu pakhat chuan “Harsatna tinreng hnuaia leng kanni” tiin a lo sawi a, a sawi dik khawp mai. Mitin te hi harsatna hnuai phuar vel kara leng thin vek kan ni si a. Khawvela mihring zawng zawngte hi a mal malin in zawt ta ila engemaw ti tala harsatna tawk miah lo kan awm ka ring lo. Harsatna hi ringtu te tan engtiang takin nge a pawimawh le? Pawimawh na a nei tur a ni, chuti nilo sela chuan harsatna tih tawngkam hi ringtu ten kan hre kher lovang! Harsatna hi kan Lalpa hian duhtak a a siam mihringte tan pawh hian kan tawh a phal a ni mai lo maw? Rinna kawng a kan chauh chang te, kan nun a inthlahdah chang te leh amah hlat a kan awm chang te hian a hnena kan kir leh theih nan, kan chungah harsatna a rawn thlen tir duh bik thin nite hian ka hre thin.

Harsatna hi mihringte nunphungah thil bet tlat pakhat ni mahse; harsatna tawk chak leh ka chungah lo thleng se ti a duhthu han sam ta sawi tur an tam vak lo mai thei, mahse, khawvela kan awm chhung hian ringtu te hian eng hunah pawh tawka hmachhawn thei reng kanni (tun ah pawh kan tawk mek ani thei). Kawng leh lama chhut chuan harsatna te hi ringtute tan chaw leh kan than lenna a tana kawng pawimawh tak a ni lawi si. Mihringte hi Pathian in min hmangaiha kan boral a phal lova, man tam tak in a fapa neih chhun Isua Krista hmangin min tlan a. Chuvangin a lak atangin bovin kal hla thin mah ila, a hnena kir leh tur in min duh a, kan boral mai tur ngaingam lovin a hmel kan hmuh leh theih nan kan chungah a chang chuan harsatna a lo thleng thin. Kan ngaihtuah thin em aw? Kan nunah hlimna leh lawmna, hlawhtlinna leh hlawkna te a lo thlen chang hi chuan Pathian kan mamawh vak thin lo. Nunphung pangngaia kan nuna, kan hriselna athat a, kan nitin hna tluang taka kan thawh a, ei leh intur kan tlakchham lova; engkim tluang tak kan thawh lai hi chuan mahni kan in ringtawk mai a, tanpuitu kan mamawh vak thin lo.

Duhthusam angin khawvelah hian kan awm reng thei silova. Rin loh leh beisei miah lova kan nunah harsatna, hlawhchhamna, natna emaw chhiatna dangte kan chungah a lo thlen hunin, mahni mihringpuite chungah rinna leh beiseina han tawp meuh chuan a tawpa kan innghahna leh kan beiseina awmchhun chu mihringah ni lovin Pathian ah a ni zawk thin. Ringtu puitling chuan harsatna a chungah a lo thlenin phunnawi mai lovin puitu Pathian a au thin a, Bible ah pawh kan hmu a Joba a hun lai a mihausa hmingthang pawh a chungah harsatna lo thlengin; a neih zawng zawng laksak a awm in, a taksa in natna khirh tak a tawrh meuh chuan khawvel hi anchhedawng mai niin a hria a pianna ni meuh pawh anchhia a lawh ta hial anih kha. Chutiang khawpa ringtu tha Bible ah meuh pawh a chanchin chuang pha mifel pawh in achunga harsatna lo thleng a hriathhiam loh chuan keini ringtu chak lo tan chuan hriatthiam theih a ni dawn em ni le? Ni e, hriatthiam a harsa nge mai, mahse Joba khan harsatna a tawh lai khan vawikhat mah Pathian hming a sawichhe ngai lo, beidawng lova a rinna a nghahna Pathian chuan a tawp ah chuan harsatna atanga hruai chhuak in malsawmna tam tak a vurin a hma a aneih aia tam zawk a pe leh anih kha. Keini pawhin harsatna kan tawhin phunnawi mai lovin Pathian hnenah in kawl tir thin ila, Amah kan hnaih theihna tur a lo nih zawk nan i hmachhawm thin ang u. Harsatna kan tawh phaltu kan Pathian hian chuta tanga min hruai chhuah pawh hi a phal a ni tih i theihnghilh ngai lovang ang u.

“ Lalpa ringtute chu Zion tlang tih nghin rual loh, kumkhua a awm reng tur ang chu an ni. Tlangte chu Jerusalem vela a awm angin Lalpa chu a mite velah awm thin, Tun atanga, kumkhuain” Sam.125:1,2.

[He thu hi GILEAD (Hyderabad Mizo Christain Fellowship chanchinbu) Vol VI Issue No.7. Dt.17.09.2006 ah chhuah ani tawh]- Lalzarzoa, University of Hyderabad

5 comments:

  1. I thuziak hi tha ka ti em a. Tun Pathianni 14.08.2016 Branch KTP Chanchinbuah lo chhuah ve ila i phal ang em ?
    Mahmuna Hnamte
    Contact : 9612569035

    ReplyDelete
  2. @Admin, phal tehreng mai lo chhuah chhawng rawh u. I comment ka lo hmu har a in duh hun takah ka rawn chhang lo che u min hrethiam dawnnia.

    ReplyDelete
    Replies
    1. Thalai huang kohhran chanchinbu ah chhuah ve ka va duh ve..

      Delete
  3. Hei hi kohhran thalai chanchinbu ah chhuahchhawn ka van duh ve le...i phal ang em??

    ReplyDelete