Jerusalem Zion Khawpui- Suakliana

Good Friday dawn hnaih vel hian Mizo hla a thluk nem deuh, lengkhawm zai lam hian lung a ti leng ve tlat thin. Chung zingah chuan Mizo hlaphuahtu zing a mi Pu Suakliana(1901-1970) hla phuah a tuarna lam hla 'Jerusalem Zion Khawpui' tih hian Good Friday boruak ah min chen tir fo mai. A hla thunawn ah hian khawvel a hnam hrang hrang leh mi chi hrang hrang te hi "Lal Isua tuarna' hian a bo a bang awm lovin min huam tel vek a, tumah kan dang tak tak love" tiin a sawi a. Chu tluka inpekna thuk leh tawrhna nasa chu he khawvel a mihring piang chhuak tawh zing ah hian kum 2010.A.D. kan chuan kai hnu meuh pawh hian an la awm ngai lo. An awm thei tawh ngai bawk hek lovang. Lal Isuan kan tana a tawrhna hi kei ang misual tan hian lo sawi nep chi a ni hauh lo!

Good Friday present atan a hla thu(lyrics) leh video hei le!

JERUSALEM ZION KHAWPUI
Phuahtu: Suakliana

1. Jerusalem Zion khawpui chu thlir teh u,
Aw mi an tam, beramno Lal lennan hmun a awm lo;
Aw lungngaihna leh lawmna Kalvari tlang a lo lang e.

Thunawn:
Aw hnam zawng zawng leh chi tin tawng tin hi,
Vanlal nau ang a tahna Kalvari ah an dang chuang lo ve;
An dang chuang love chitin tawngtin hi,
Vanlal nau ang a tahna Kalvari ah an dang chuang lo ve.

2.Jerusalem khawpui thar nuam chu thlir teh u,
Aw mi an tam beramno lal lenna hmun mawi ah chuan;
Aw Kalvari ah Pathian khawngaihna dawn a tul mange.

3.Haleluia! hrilthiam ila Haleluia!
Aw hmangaihna dai chuang ngailo nunna parmawi;
Sawithiam awm maw hrilh thiam awm tak ang maw Aw hmangaihna hi.

Ka Pa in an hun lai a Good Friday an hman dan min hrilh ka la hriatreng chu Good Friday Ni hian Kohhran Nu hovin Biak In maicham leh pulpit ah leh a remchang laiah puandum an zar a, an tap hawm hawm thin a ni awm e. Chubakah Lal Isua thihna sun nan khawpumin an hriat theih turin darkhuang an vaw ri thin a ni awm e. Kan Mizo Kristian hmasa te khan Good Friday hi an hriatthiam ang tawkin a takin tawrhna tak tak nen an lo hmang thin niin a hriat. Chutianga hman chu a tha ber anih leh nih loh lam chu ka hre chuang lova, mahse hetia Mizote Kristian kan nih hnu hian kan hmandan leh lawmdan tam tak hi chu a danglam ve telh telh niin a hriat ve theih.

Mizo khawtlang in a mitthi kan sun thin dan anga pawndum leh darkhuang te nen a an lo hman thin lai khan Mizo takin Lal Isua thihna hun an lo hmang a, an rilru tak tak in an tuarpui ngei ka ring. Hetiang ang tak hi a lawm kan hnam nun mila Kristianna kalpui hian kan thinlung ah a fiah deuh zawk ka beisei ve thin. Tunlai hun ah chuan hmanlai angin puandum leh darkhuang nena Biak In vela lo phusak chiam chu a rem tawh lem lo, mahse kan thusawi leh in zirtirna/in kawhhmuhna lamah te hian kan Mizo khawtlang kalphung mil zawnga kan sawifiah theih chuan kan thinlungah awmzia a nei thuk zawk ngei ang.