A hrim hrim ah!!(?)

Campus a kan nau te zingah hian ngamtlak em em mai pakhat ka nei a, phone a kan inbiak te hian fiamthu hian "a hrim hrim ah.." te hi kan han ti leh hluai zel a, engkhaw ruai chu kan sawi azeng pawh ani chuan lem hlei lova..tawngkam takah hian "a hrim hrim ah..." tih hi kan chhak chhuak ta fo chu a nih hi! Ka lo chhut ngai lutuk lem lova, tawngkam chhe tleuh nan taka kan hman 'a hrim hrim ah..' tih hi a lo dik lutuk lem lova, tlema tawngkam dik leh hmang uluk deuh te chuan 'a hrim hrim ah' ti lo hian 'a thu hrim in..' tih zawk tur a ni e an ti thin. A nih leh a thu hrim in ka thil sawi hi hnial hrat sabawp chan in huam in han sawi teh chiam pawh ni ila, a hmangtu keini thangthar bengtla lo bengkaw rawng chhung ah hi chuan engkhaw ruai ah a lut zo meuh tawh lo a nih chhia va hi. Chutih a nih hnu hman ah chuan kan sawi lai mek, thangthar bengtla lo beng kaw rawng te ka'n ti ve thla ri rawk a, tlema hnialhrat pa chekngel deuh tan chuan a kaw tawp rat thleng ngam khawp a hnial theih ka lo ni ve tho si. Zanriah hmeh that vak loh zana nuber lungawi lo ang hmuar hmuar leh naupang tlei lo vauni reng bulah chengin pa ber in rappui chung sanga vaihlo tui belphuar ngat zuk pahin tapchhak lungthu nghenga thingpui bel a mi zothingpui fe ngeia lum thingphui dawt hruk hruk pahin min han hnial ta sela. Bengkua hi a kawrawng a ni satliah mai bik lova, bengkawmin a tuam bengkaw chhung ah hian leilung siam tirh ata tawh Khuannu in hringfate taksa a awmtur a lo duan lawk reng beng-ek a awm ve tho asin tiin min liak let ta hrep mai sela. Sawi leh tur haihchhama ngawih bo san vang vang a nih loh chuan a thusawi beng-ek ah chuan beng-ek khawro nge beng-ek tui deuh tih te zawt leh ta hlauh ila, a lo ngaithla ve tu a bula thu an ni nula lengtul tawh Uthangi te ang nula chimlim leh tenchhe deuh tan chuan kan inhnialna thu fahrah te te chu bar ah khawn a hnekin min thinhrik phah nan te pawh a hmang mai dah law'maw tih te pawh ka hlau hlel lo ve a. A..a thu a nawi mai bakah benga hlin ber tur thumum awm mang silova inhnialna thu fahrah te te sawi vak ai chuan mahni kuang lo nawr te pawh nih a hlauhawm a, a tula kan la peih leh ta a nih leh hunrem chang dang melh ran chungin hmatiang kan thlir aniang chu. Bengsika ngaihtuah pawh in tuna kan thu han thailai ve teh chai te hi zawng thu va uk pawh va ni pha suh i!

(a ho hle i lo ti ta anih pawn tun ka'n dem hlei lawng che!)