Kan Sikul

Pic-Sialsuk High School

Kum 1952 a din kan khaw High School hi uluk takin "Sialsuk Government High School, Sialsuk" kan ti deuh kher thin! MSLC kan pass ve a, phur takin admission ti turin H/S office Pa Thana Office tukverh te lo in hawng ah chuan kan Transfer Certificate leh chhungten admission fee tur min pek pawisa kan pe lut ve a, kan khua a zirna in sangber a lut tur kan ni ve ta a, kan hlim zia tak kha aw! Kan khaw High Sikul ah hian kum thum ka lut a, kan luh tan tirh kum chuan kan pawl ah pawh a te pawl ka ni a, kan thianho kha kan intiat tlan deuh avangin kan zitirtirtu ten chawlhlawk hun lai leh sikul ban pah a thil ti turin min tir fo mai.

Pic- Sialsuk H/S view from chaihte tlang

Hmundang sikul ang lo takin Student Union ti lovin Student Council kan nei a, kan hruaitu ten 6 July ah Council day ruai nen ngei a hmanpui min duh thin avangin zirlai te kha thiam ang tawk tawkin kan inhlawh thin a, sikul chawlh ni leh kar lak ah zirtirtute chawlh an dil a, mi thingzai thiar te, lei laih te, thingtuah tur te la in kan hnatlang thin a. Khuaihnuai rama thingzai kan thiar tum chuan kan lo la te viau aniang kan thian ho 5/6 vel khan thingzai 1(3X4) kan zawn a kawng a chho deuh nen kan hahpui ve khawp mai. Chhun chaw hmeh atan dal leh sangha tin chhumpawlh kan hmeh thin a, kan tlai pui em em thin. Chaw ei kham ah fiamthu thiam deuh leh tlem a u deuh te an in kap tawn kan nui dur dur thin a, ban dawn ah hming lamna hun kan nei leh a a kallo te kha chu pawisa chawi ngei a ngai thin. Council day a lo thleng ta kan nghahhlelh em em a nih avangin uniform ha lovin mahni thawmhnaw neih that ber kan ha chhuak a, pawl riat naupang ho kha chu new comer kan nih avangin ruai theh na tur bungbel leh tui chawi vel kha kan tih tur a ni tawp a, programme hlimawm tak kan hmang thin. Zu in phal loh ni mahse kan ute deuh lo inti tlangval deuh chin ho thenkhat te kha council day hman zawh tuk vel ah chuan Sikul atanga kar 1/2 suspend an tawk ve fo mai. Malzai(solo), Drama, Debate leh quiz hlimawm tak te kan nei thin a, a hun lai chuan a tluk awm thei pawn ka hre bik lo, a lo nuam thin a ni.

Pic-Sialsuk H/S view from Hall tlang

Exam dawn a lo ni a thut dan tur kan zirtirtu ten an han siam fel a, zirlai ho kha min han thut chhin tir vel a, kan thut pui tur te hmeichhia emaw kan nel vak lo te an nih chuan nuam lo ve duh tak a ni. Zirtawpni chawhnu ah W.E hun a nih thin avangin SUPW(Socialy Useful Productive Wok) kan hmang thin a, thlanmual kawng siam that, thlanmual sam fai te, sikul hung na tur thingtuai leh palban emaw mau te kan pu thin bawk. Tumkhat Kan Headmaster Pu.Ralkapa hovin Sialsuk Field sir ah tuiluan kawr tur kan siam tha, DDK-Aizawl ah Kut hnathawk tute pual in Basmati buh chungchang an rawn sawi hi kan en fuh pek a, hna kan thawh pah chuan "basmati" kan ti chhen a, kan hotupa meuh pawn a tawp lamah chuan "basmati" a rawn ti ve ta a, kan hlimpui khawp mai.

Pic-view from teachers' common room

Infiamna lam ah erawh kan pawlpui ten volleyball an ben peih em em laiin keini thian ho ve kha chu Annual Sports kan nei dawn tum ni ta in ka hria kan Sir pakhatin kan tet deuh vang nge ni Hmeichhia team 1 nen a volleyball ah in tum tir min tum a, keini thianho khan beng ve ngam ta lo chuan sikul hnung lamah kan tlan chhe nasa mai, infiamna lam kan ti mi lo tlang a ni e.

Pic-Sialsuk H/S step and canteen

Student council hruaitu thlan tum a zara(ka thianpa ka hmingpui) nen a nominate a tel miah lo mipakhat hming kan ziak lui hram te kha kan lo hoh zia ti lang tu pakhat chu a ni ve a ni. Kan Sikul kawt ah hian lungme deuh chang lutuk lo hi a awm a, tah chuan Tluangtea'n uluk takin motor kawng a siam thin a, keinin ram chin kan lo insem ve a, mahni pual a lem mah nise ram ka neih ve hmasak pawl a ni ang! a hming ah pawh "Kutudu" kan tih tak nghe nghe kha! Dangdai thin khawp mai. Thing kan put tuma Tlangkhamphei Lunglian hmun a K.Siama'n "Butter ka chawm tawh" a rawn ti chhuak ringawt te kha tun thleng hian engvanga rawn sawi chhuak ngawt nge a ni tih kan la hre chhuak zo chuang lo!

Pic-Teachers' common room

Hnehzauva kawrlum hma a 'O-Zell, O-Zell, O-Zell' tih in ziak te, Hualdinga Jacket a 'Nissin' tih inziak a awm vang mai a "Nissin" ti a kan chhaih a a huat ve ngawt thu te, Tesawma T-Shirt hm a "No Problem" tih inziak te kha mitthla ah a la cham reng mai. Biakvela kawr hma inziak DIDAS tih nita in ka hria chumi hminga amah kan koh ngawt thin lai te kha aw! thildang inziak thenkhat te chu "natural heart" tih te, "Comfortable" tih te kha ka mitthla ah ala cham thei nia. Kan nun kha lo mawlmang in lo ho thin viau mahse kan zirtirtute an fel a, vawiin thleng hian he sikul a ka lut thei hi vannei ka la in ti tho tho, an mi zirtir na vang liau liau tun hun thleng hian zirna te chhunzawm theiin ka la awm ve a ni tih hi sawi telh talh ka duh.

Pic- Cl-Viii kan nih lai kan classroom thin

Tun apangin khang hun lai kan ti ve tan chu a nia, ka pawlpui te a bikin ka thiante ti teh ang-Zara(Chhunrawl Weekly Editor), Tluangtea(BD Student, ATC), K.Siama( New Atlantis School), Biakvela(Sir), Hnehzauva, Tezuala(Electronics expert), Muansanga(Pee-Doh), Hmuaka(Nupui sun) te nen phei kha chuan tun thleng hian hmun hran hran ah awm mah ila, kan thinlung theuh hi ala in hlat tak tak thei lo. NCC kan parade lai te, CATC kan kal tum te, Study Camp te pawh sawi tur ala tam mai phur a chhuah leh thut leh la chhunzawm ang!!

Pic- H/S a chung rawng an hnawih hma