Sangha (Fish)

Sangha (Fish) hi khawvel hnam tin hian an ngaina niin a langa, sangha ei lo hnam/ram phei chu an vang khawp ang. Sangha hi abikin India ramah phei chuan chawhmeh lar ber leh ei nasat ber pawl ani. Sangha avang hian ram tam takin sum tam tak an la lut a, mitam tak in sangha avang hian ei zawnna neiin nupui fanau chhungkua an chawm theih phah fo thin ani. Western Pacific Ocean atanga intanin east coast of Taiwan te leh hmar thlang(NW) hawi zawnga phei zelin Japan thlenga luah chhovin Kuroshio Current (Warm water Current) a awma, tin hemi tawk tur tak hian Oyashio Current (Cold water Current) chu khawchhak lam(eastern shore of Japan) tuipui kam lam hawiin a tleh chho ve leh bawk a chu chuan North Pacific Current (or Drift) ava zawm a. Hei mi tuifinriat current lum leh vawt in tawh na lai tak ah hian Sangha a atam em em mai a, chu chu Japan ram economy innghahna pawimawh tak pakhat ani e tiin Commercial Geography paper ah kan zir thin. Ani taka Sangha leh mihringnun hi lak hran harsa tak chu alo ni. History han en ila, hmanlai mite ei leh in chungchangah phei chuan sangha a tello khat khawp mai. Sangha hian mirethei leh miropui te inkar a thliar ve lova, VIP/Officer Mess atanga thingtlang kil tawp thleng pawhin chawi ei dawhkan hmunlai lum a luah thin in mite tan puar leh fanna a pe thin ani.

India ramah pawh hian Sangha avangin External Ministry hotute an vir kual zak zak fova, achhan pawh Sangha man tute International Boundary an lo kal pelh thin vang ani a, Ram hruaitu zin chhuak reng rengin ram thenawm sawrkar hotute an dawr na ah pawh sangha mantute in chhuah sak tawn chungchang hi an khel awllo fo thin ani. Sangha hian identity a siam ve thei khawp mai bawk a, hman a India independence movement lai vel khan Muslim hovin Muslim League an din chhoh lai vel ani a, Madras khawpuia India National Congress Session neih anih khan an hotupa Sir.Sayed Khan a lungawi lo ang thawm pawh khan "Hoogly Sangha a chawm len Bengali ho duh dan leh Bombay mi thiltithei tlemte duhdan a kal INC tiin" a sawisel anih kha! Kei pawh hin Bengali ho hi an nunah sangha hi a bet tel tlat niin ka hria, ka roomate thin 1 pawh kan campus piah pawn lamah weekend hi chuan Sangha ei turin a chhuak vang vang thin a.

Kristianna leh Sangha: Isua zirtirte leh ringtu hmasa te kha Rome sawrkar a tih duhdah chhohtak hnu leh Coloseum/Catacomb hun lai khan an chhinchhiahna ah Sangha lem an lo hmang tawh thin ani. Lal Isua khan Mipui sangnga a hraikhan Sangha 2 leh changper 5 a hmang anih kha. A zirtir te pawh Li thuklam pan a Sangha man turin a fuih fo thin. Zankhat pawh Petera ten Galili dilah sangha an man a zankhua in engmah an man lova nimahsela Lal Isua thupek angin len an han vawrh meuh chuan an len dawllo khawp sangha an man ta a an len pawh a chat pheuh pheuh ani tih Bible ah kan hmu thei..Sangha hi a pawimawh aniang Lal Isua thlana atanga a thawh leh hnu pawh khan zirtirte bulah Sangha a va ei leh anih kha! Kristianna leh Sangha hi lak hran tak tak a harsa khawp mai. Bible ah reng mai Sangha chungchang sawina hmuh tur tam tak a awm a sawisen pawh ani lo hial zawk.

HCU FISHERMEN

Sangha leh Keimah : Kan naupan ve deuh lai atang tawhin Ka Pa hian sangha man a peih thei khawp mai a, holiday leh hun remchang anneih phawt chuan an thian hovin luiah sangha man turin an chhuak fova, sangha kan ei nasa ve thin. Heng vang te hi nge maw ni Sangha hi chu ka ngaina lo khawp maia, a rim hriat hi ka duh tawk e ka ti mai thin a, hostel velah pawh thianten sangha an chhum ru fova ka tih fuh chang phei chuan ei pui chu sawi loh ka chhuahsan zawk thin ani. Sangha ei duh lo hi thlang ta se ka in contest ngam ang tih ve hial khawpin ka ngaina lo a. Nimin piah a campus dil pakhat a thiante hnungzuia kan va kal chu Sangha kan hawn teuh maia, Hostel ah chawhmeh tui hmuh tur alo vang nen kan sangha hawn rin aiin a lo thang lova kei Sangha ei ngai hleilo khan puar khawp in kan ei ve tak teuh chu! rin ai daih a ka ei tui ani.